ಪ್ರಾಣ ರಕ್ಷಣೆಯೇ ಮುಖ್ಯವಾಗಿತ್ತು: ಮೋದಿ ಜತೆ ಪೈಲಟ್ ಸ್ಮಿತ್‌ ಮಚ್ಚರ್ ಮಾತು
ನವದೆಹಲಿ (ಪಿಟಿಐ): ‘ನಾನು ನನ್ನ ಪ್ರಾಣ ಉಳಿಸಿಕೊಳ್ಳಲು ಹೋರಾಡುತ್ತಿದ್ದೆ. ಆದರೆ, ಅದೇ ಸಮಯದಲ್ಲಿ ಇತರರನ್ನು ಸಾಯಲು ಬಿಡಬಾರದು ಎಂದು ದೃಢ ನಿರ್ಧಾರ ಮಾಡಿದ್ದೆ’ ಎಂದು ಫ್ಲೈದುಬೈ ವಿಮಾನದ ಪೈಲಟ್ ಸ್ಮಿತ್‌ ಮಚ್ಚರ್ ಅವರು ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ತಿಳಿಸಿದ್ದಾರೆ.
ಅಬುಧಾಬಿಯ ಆಸ್ಪತ್ರೆಯೊಂದರಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಮಚ್ಚರ್ ಅವರಿಗೆ ಪ್ರಧಾನಿ ಶುಕ್ರವಾರ ವಿಡಿಯೊ ಕರೆ ಮಾಡಿ ಮಾತನಾಡಿದ್ದಾರೆ. ಆಸ್ಪತ್ರೆಯ ಹಾಸಿಗೆಯಿಂದಲೇ ಮಾತನಾಡಿದ ಮಚ್ಚರ್, ವಿಮಾನದಲ್ಲಿ ನಡೆದ ಘಟನೆ ಹಾಗೂ ಪ್ರಯಾಣಿಕರ ಪ್ರಾಣ ಕಾಪಾಡಲು ತಾವು ನಡೆಸಿದ ಪ್ರಯತ್ನವನ್ನು ವಿವರಿಸಿದ್ದಾರೆ.
ದುಬೈನಿಂದ ಟೆಲ್ ಅವೀವ್‌ಗೆ ತೆರಳುತ್ತಿದ್ದ ಫ್ಲೈದುಬೈ ಸಂಸ್ಥೆಯ ವಿಮಾನವನ್ನು ಪತನಗೊಳಿಸುವ ಪ್ರಯತ್ನ ಬುಧವಾರ ನಡೆದಿತ್ತು. ಸಹ ಪೈಲಟ್ ನಡೆಸಿದ ಹಲ್ಲೆಯಿಂದ ಗಾಯಗೊಂಡಿದ್ದರೂ, ಭಾರತ ಮೂಲದ ಪೈಲಟ್ ಮಚ್ಚರ್ ಅವರು ವಿಮಾನದ ಸಿಬ್ಬಂದಿ ಹಾಗೂ ಕೆಲವು ಪ್ರಯಾಣಿಕರ ನೆರವಿನಿಂದ ದುರಂತವನ್ನು ತಪ್ಪಿಸಿದ್ದರು.
‘ನಾನು ಗಾಯಗೊಂಡು ಕಾಕ್‌ಪಿಟ್‌ನಲ್ಲಿ ಕೆಳಕ್ಕೆ ಬಿದ್ದಿದ್ದೆ. ನನ್ನಲ್ಲಿ ಉಳಿದಿದ್ದ ಶಕ್ತಿಯನ್ನು ಬಳಸಿಕೊಂಡು, ಸರಿಯಾದ ರೀತಿಯಲ್ಲಿ ಕಾರ್ಯನಿರ್ವಹಿಸಿ ವಿಮಾನ ಪತನಗೊಳ್ಳುವುದನ್ನು ತಪ್ಪಿಸಿದೆ’ ಎಂದು ಮಚ್ಚರ್ ಹೇಳಿದ್ದಾರೆ.
‘ಅದು ಅತ್ಯಂತ ನಿರ್ಣಾಯಕವಾದ ಕ್ಷಣವಾಗಿತ್ತು. ವಿಮಾನ ಇನ್ನೇನು ನೆಲಕ್ಕೆ ಅಪ್ಪಳಿಸಲಿದೆ ಎಂಬುದು ನನಗೆ ಅರಿವಾಯಿತು. ಹಲ್ಲೆಯಿಂದಾಗಿ ದೇಹದ ಹಲವೆಡೆ ಗಾಯಗಳಾಗಿದ್ದವು. ಕೆಳಕ್ಕೆ ಬಿದ್ದರೂ, ಎದ್ದು ಹೋರಾಡಬೇಕು ಎಂದು ನನ್ನಲ್ಲೇ ಹೇಳಿಕೊಂಡೆ. ಬಹಳ ಶ್ರಮಪಟ್ಟು ಕಾಕ್‌ಪಿಟ್ ಬಾಗಿಲು ತೆರೆದೆ. ಆಗ ಸಿಬ್ಬಂದಿ ಹಾಗೂ ಪ್ರಯಾಣಿಕರು ನನ್ನ ನೆರವಿಗೆ ಬಂದರು. ವಿಮಾನ ಪತನಗೊಳ್ಳುವುದನ್ನು ತಪ್ಪಿಸುವಲ್ಲಿ ಇತರರ ಪಾತ್ರವೂ ಅಷ್ಟೇ ಮುಖ್ಯವಾಗಿತ್ತು’ ಎಂದು ಘಟನೆಯನ್ನು ವಿವರಿಸಿದ್ದಾರೆ.
ಪೈಲಟ್ ಅವರ ಧೈರ್ಯ, ಸಮಯಪ್ರಜ್ಞೆ ಮತ್ತು ಸಂಯಮವನ್ನು ಶ್ಲಾಘಿಸಿದ ಪ್ರಧಾನಿ, ಮಚ್ಚರ್ ಅವರು ಕ್ಷಣಮಾತ್ರದಲ್ಲಿ ನಿರ್ಧಾರ ಕೈಗೊಂಡು ಅನೇಕ ಜನರ ಪ್ರಾಣವನ್ನು ಉಳಿಸಿದ್ದಾರೆ ಎಂದು ಹೇಳಿದ್ದಾರೆ.
‘ಭಾರತೀಯರು ಇತರರ ಪ್ರಾಣವನ್ನು ತೆಗೆಯುವವರಲ್ಲ, ಬದಲಾಗಿ ಇತರರನ್ನು ರಕ್ಷಿಸಲು ತಮ್ಮ ಪ್ರಾಣವನ್ನೇ ಪಣಕ್ಕಿಡುವವರು ಎಂದು ಇಡೀ ದೇಶ ಈಗ ಹೆಮ್ಮೆಯಿಂದ ಹೇಳಬಹುದು’ ಎಂದು ಮೋದಿ ಅವರು ಸ್ಮಿತ್‌ ಅವರಿಗೆ ತಿಳಿಸಿದ್ದಾರೆ.
ಉತ್ತಮ ಚಿಕಿತ್ಸೆ: ತಮಗೆ ಆಸ್ಪತ್ರೆಯಲ್ಲಿ ಒಳ್ಳೆಯ ಚಿಕಿತ್ಸೆ ದೊರೆಯುತ್ತಿದೆ ಎಂದು ಮಚ್ಚರ್ ತಿಳಿಸಿದ್ದಾರೆ. ಮಚ್ಚರ್ ಅವರ ಉತ್ತಮ ಆರೈಕೆಗಾಗಿ ಸೌದಿ ಅರೇಬಿಯಾ ಮತ್ತು ಯುಎಇ ಸರ್ಕಾರಗಳಿಗೆ ಪ್ರಧಾನಿ ಕೃತಜ್ಞತೆ ಸಲ್ಲಿಸಿದ್ದಾರೆ.
‘ಹನುಮಾನ್ ಚಾಲೀಸಾ ಪಠಿಸುವೆ’
ಸಂಕಷ್ಟ ಬಂದಾಗಲೆಲ್ಲಾ ತಾವು ‘ಹನುಮಾನ್ ಚಾಲೀಸಾ’ ಪಠಿಸುವುದಾಗಿ ಸ್ಮಿತ್‌ ಮಚ್ಚರ್ ಅವರು ಪ್ರಧಾನಿ ಮೋದಿ ಅವರಿಗೆ ತಿಳಿಸಿದ್ದಾರೆ.
ಮೋದಿ ಆ ಕುರಿತು ಮೆಚ್ಚುಗೆ ವ್ಯಕ್ತಪಡಿಸಿದಾಗ ಮಚ್ಚರ್, ‘ನಾನು ದೇಶದಿಂದ ದೂರವಿದ್ದೇನೆಯೇ ಹೊರತು, ನಮ್ಮ ಸಂಸ್ಕೃತಿಯಿಂದಲ್ಲ’ ಎಂದು ಪ್ರತಿಕ್ರಿಯಿಸಿದ್ದಾರೆ.
‘ನಿಮ್ಮ ಶೀಘ್ರ ಚೇತರಿಕೆಗಾಗಿ ದೇಶದಾದ್ಯಂತ ದೇವಾಲಯಗಳಲ್ಲಿ ವಿಶೇಷ ಪ್ರಾರ್ಥನೆ ನಡೆಸಲಾಗುತ್ತಿದೆ ಮತ್ತು ಹಲವರು ಮಹಾಮೃತ್ಯುಂಜಯ ಮಂತ್ರ ಪಠಿಸುತ್ತಿದ್ದಾರೆ’ ಎಂದು ಮೋದಿ ಅವರು ಪೈಲಟ್‌ಗೆ ತಿಳಿಸಿದ್ದಾರೆ.
ಸಂಭಾಷಣೆಯ ವೇಳೆ ಭಾವುಕರಾದ ಪೈಲಟ್, ಮೋದಿ ಅವರಿಂದ ಕರೆ ಬಂದಿರುವುದು ತಮಗೆ ಅಪಾರ ಹೆಮ್ಮೆ ತಂದಿದೆ ಮತ್ತು ಅವರೊಂದಿಗೆ ಮಾತನಾಡುವ ಅವಕಾಶ ಸಿಗುತ್ತದೆ ಎಂದು ಯಾವತ್ತೂ ಊಹಿಸಿರಲಿಲ್ಲ ಎಂದಿದ್ದಾರೆ.
ಮಚ್ಚರ್ ಅವರು ಗುಜರಾತ್‌ ಮೂಲದವರಾಗಿರುವುದರಿಂದ, ಪ್ರಧಾನಿ ಕೆಲಹೊತ್ತು ಅವರೊಂದಿಗೆ ಗುಜರಾತಿ ಭಾಷೆಯಲ್ಲೂ ಮಾತನಾಡಿದ್ದಾರೆ.