ಚಿಂತಾಮಣಿ ನಗರದಲ್ಲಿ ಜೋರು ಮಳೆ
ಚಿಂತಾಮಣಿ: ನಗರದಲ್ಲಿ ಸೋಮವಾರ ಸಂಜೆ ಸುರಿದ ಜೋರು ಮಳೆಯಿಂದಾಗಿ ವಾತಾವರಣ ತಂಪಾಗಿದೆ.
ಸುಮಾರು ಒಂದು ಗಂಟೆ ಸುರಿದ ಮಳೆಯಿಂದಾಗಿ ರಸ್ತೆ, ಚರಂಡಿಗಳಲ್ಲಿ ನೀರು ತುಂಬಿ ಹರಿಯಿತು. ಮೂರು ದಿನಗಳಿಂದ ಬಿಸಿಲಿನಿಂದ ತತ್ತರಿಸಿದ್ದ ಜನತೆಗೆ ಸಂಜೆಯ ಮಳೆ ತಂಪೆನಿಸಿದೆ.
ಮಳೆಯಿಂದಾಗಿ ರಸ್ತೆಗಳ ತಗ್ಗು ಪ್ರದೇಶಗಳು ಜಲಾವೃತಗೊಂಡಿವೆ. ರಸ್ತೆಗಳಲ್ಲಿ ನೀರು ನಿಂತಿದ್ದರಿಂದ ವಾಹನ ಸವಾರರು ಹಾಗೂ ಜನರ ಸಂಚಾರಕ್ಕೆ ಅಡಚಣೆ ಉಂಟಾಯಿತು.
ತಾಲ್ಲೂಕಿನಲ್ಲಿ ತಡವಾಗಿ ರಾಗಿ ಬಿತ್ತನೆ ನಡೆದಿದ್ದು, ರೈತರು ಕಳೆ ತೆಗೆಯುವ ಕಾರ್ಯದಲ್ಲಿ ನಿರತರಾಗಿದ್ದರು. ವಾರದಿಂದ ಮಳೆ ಇಲ್ಲದೆ ಪೈರು ಬತ್ತುವ ಸ್ಥಿತಿಗೆ ತಲುಪಿತ್ತು. ಹಾಗಾಗಿ ಸಂಜೆ ಸುರಿದ ಮಳೆಯು ಬೆಳೆಗೆ ಜೀವಕಳೆ ತಂದಿದ್ದು, ರೈತರ ಮೊಗದಲ್ಲಿ ಮಂದಹಾಸ ಮೂಡಿಸಿದೆ.