Parenting Tips: ನಿಮ್ಮನೇಲಿ ಮೊದಲ ಮಗುವೇ ಸ್ಮಾರ್ಟಾ? ಯಾರ IQ ಹೆಚ್ಚು? ವಿಜ್ಞಾನ ಏನು ಹೇಳುತ್ತದೆ?
ಒಂದೇ ಮನೆಯಲ್ಲಿ, ಬಹುತೇಕ ಒಂದೇ ರೀತಿಯ ಪೋಷಕರ ಆರೈಕೆಯಲ್ಲಿ (Parenting Tips) ಮತ್ತು ಒಂದೇ ರೀತಿಯ ಸೌಲಭ್ಯಗಳೊಂದಿಗೆ ಬೆಳೆದರೂ ಸಹ ಸಹೋದರ-ಸಹೋದರಿಯರ ಬುದ್ಧಿಮತ್ತೆಯಲ್ಲಿ ವ್ಯತ್ಯಾಸ ಕಂಡುಬರುತ್ತದೆ. ಒಬ್ಬ ಮಗು ಓದಿನಲ್ಲಿ ಮುಂಚೂಣಿಯಲ್ಲಿದ್ದರೆ, ಮತ್ತೊಬ್ಬ ಮಗು ಎಲ್ಲವನ್ನೂ ಪ್ರಶ್ನಿಸುವ ಕುತೂಹಲ ಹೊಂದಿರಬಹುದು. ಇನ್ನೊಬ್ಬಳು ಜನರೊಂದಿಗೆ ಬೆರೆಯುವ ಮತ್ತು ಪರಿಸ್ಥಿತಿಯನ್ನು ನಿಭಾಯಿಸುವಲ್ಲಿ ಹೆಚ್ಚು ಚಾಣಾಕ್ಷಳಿರಬಹುದು.
ಹಾಗಾದರೆ ಈ ವ್ಯತ್ಯಾಸಕ್ಕೆ ಕಾರಣವೇನು? ವಂಶವಾಹಿಗಳು, ಪರಿಸರ, ಶಿಕ್ಷಣ, ಪೋಷಕರ ಪ್ರಭಾವ ಸೇರಿದಂತೆ ಹಲವು ಅಂಶಗಳಿವೆ. ಆದರೆ ಕುತೂಹಲಕಾರಿ ಸಂಗತಿಯೆಂದರೆ, ಮಗು ಹುಟ್ಟಿದ ಕ್ರಮವೂ ಬುದ್ಧಿಮತ್ತೆಯ ಮೇಲೆ ಸ್ವಲ್ಪ ಮಟ್ಟಿಗೆ ಪ್ರಭಾವ ಬೀರುತ್ತಿರಬಹುದು ಎಂದು ಕೆಲವು ಸಂಶೋಧನೆಗಳು ಸೂಚಿಸುತ್ತವೆ.
ಮೊದಲ ಮಗು ಹೆಚ್ಚು ಬುದ್ಧಿವಂತವೇ?
ಹೆಚ್ಚಾಗಿ ಮೊದಲ ಮಗು ಸ್ಮಾರ್ಟ್ ಆಗಿರುವುದು ಕಂಡುಬರುತ್ತದೆ. ಆದರೆ ಯಾವಾಗಲೂ ಮೊದಲ ಮಗುವೇ ಅತ್ಯಂತ ಬುದ್ಧಿವಂತ ಆಗಿರುತ್ತದೆ ಎಂದೇನಿಲ್ಲ. ಆದರೆ ಕೆಲವು ಅಧ್ಯಯನಗಳು ಮೊದಲ ಮಗುವಿಗೆ ಬೌದ್ಧಿಕ ಬೆಳವಣಿಗೆಯಲ್ಲಿ ಸಣ್ಣ ಪ್ರಯೋಜನವಿರಬಹುದು ಎಂದು ಸೂಚಿಸಿವೆ. ಎಡಿನ್ಬರ್ಗ್ ವಿಶ್ವವಿದ್ಯಾಲಯದ ಸಂಶೋಧನೆಯೊಂದರಲ್ಲಿ, ಮೊದಲ ಮಕ್ಕಳು ತಮ್ಮ ಕಿರಿಯ ಸಹೋದರ-ಸಹೋದರಿಯರಿಗಿಂತ ಕೆಲವು ಚಿಂತನಾ ಕೌಶಲ್ಯಗಳಲ್ಲಿ ಉತ್ತಮ ಅಂಕಗಳನ್ನು ಗಳಿಸಿರುವುದು ಕಂಡುಬಂದಿದೆ.
ಇದೇ ಸಂಶೋಧನಾ ತಂಡವು, ಅನಾಲಿಸಿಸ್ ಗ್ರೂಪ್ ಮತ್ತು ಯೂನಿವರ್ಸಿಟಿ ಆಫ್ ಸಿಡ್ನಿಯ ಸಂಶೋಧಕರೊಂದಿಗೆ ಸೇರಿ, ಅಮೆರಿಕದ ಬ್ಯೂರೋ ಆಫ್ ಲೇಬರ್ ಸ್ಟಡೀಸ್ ಸಂಗ್ರಹಿಸಿದ್ದ ಸಮೀಕ್ಷಾ ಮಾಹಿತಿಯನ್ನು ವಿಶ್ಲೇಷಿಸಿತ್ತು. ಮೊದಲ ಮಕ್ಕಳು ಕೇವಲ ಒಂದು ವರ್ಷದ ವಯಸ್ಸಿನಲ್ಲಿಯೇ ತಮ್ಮ ಕಿರಿಯ ಸಹೋದರ-ಸಹೋದರಿಯರಿಗಿಂತ ಕೆಲವು IQ ಪರೀಕ್ಷೆಗಳಲ್ಲಿ ಉತ್ತಮ ಅಂಕಗಳನ್ನು ಗಳಿಸಿರುವುದು ಕಂಡುಬಂದಿತ್ತು.
ಆದರೆ ಇಲ್ಲಿ ಒಂದು ಪ್ರಮುಖ ಅಂಶವಿದೆ. IQ (intelligence) ಮೇಲೆ ಹುಟ್ಟಿದ ಕ್ರಮದ ಪ್ರಭಾವ ಇದ್ದರೂ ಅದು ಸಣ್ಣ ಪ್ರಮಾಣದಲ್ಲಿರಬಹುದು ಮತ್ತು ಪ್ರತಿಯೊಬ್ಬ ಮಗುವಿನ ವೈಯಕ್ತಿಕ ಸಾಮರ್ಥ್ಯವೇ ಮುಖ್ಯ.
ಮೊದಲ ಮಗುವಿಗೆ ಹೆಚ್ಚು ಪ್ರಯೋಜನ
ಸಂಶೋಧಕರು ಇದಕ್ಕೆ ಹಲವು ಕಾರಣಗಳನ್ನು ಸೂಚಿಸಿದ್ದಾರೆ.
1. ಮೊದಲನೆಯದು, ಮೊದಲ ಮಗು ಹುಟ್ಟಿದಾಗ ಪೋಷಕರ ಗಮನ ಬಹುತೇಕ ಸಂಪೂರ್ಣವಾಗಿ ಅದರ ಮೇಲೆಯೇ ಇರುತ್ತದೆ. ಮಗುವಿನೊಂದಿಗೆ ಮಾತನಾಡುವುದು, ಕಥೆ ಹೇಳುವುದು, ಆಟವಾಡುವುದು, ಪ್ರಶ್ನೆಗಳಿಗೆ ಉತ್ತರಿಸುವುದು ಮತ್ತು ಹೊಸ ವಿಷಯಗಳನ್ನು ಕಲಿಸುವುದು ಮುಂತಾದ ಚಟುವಟಿಕೆಗಳಿಗೆ ಹೆಚ್ಚು ಸಮಯ ಸಿಗಬಹುದು. ಮುಂದೆ ಮತ್ತೊಂದು ಮಗು ಬಂದಾಗ ಪೋಷಕರ ಸಮಯ ಮತ್ತು ಗಮನ ಹಂಚಿಕೊಳ್ಳಬೇಕಾಗುತ್ತದೆ. ಎಲ್ಲ ಮಕ್ಕಳಿಗೂ ಪೋಷಕರು ಸಮಾನ ಪ್ರೀತಿ ಮತ್ತು ಭಾವನಾತ್ಮಕ ಬೆಂಬಲ ನೀಡಬಹುದು. ಆದರೆ ಚಿಂತನಾ ಕೌಶಲ್ಯ ಬೆಳೆಸುವ ಚಟುವಟಿಕೆಗಳಿಗೆ ದೊರೆಯುವ ಸಮಯದಲ್ಲಿ ವ್ಯತ್ಯಾಸ ಇರಬಹುದು.
2. ದೊಡ್ಡ ಮಗು ಟೀಚರ್ ಗುಣಗಳನ್ನು ಬೆಳೆಸಿಕೊಳ್ಳುತ್ತದೆ ಎಂಬುದು ಮತ್ತೊಂದು ಆಸಕ್ತಿದಾಯಕ ಸಂಗತಿ. ಹಿರಿಯ ಮಕ್ಕಳು ತಮ್ಮ ಕಿರಿಯ ಸಹೋದರ-ಸಹೋದರಿಯರಿಗೆ ವಿಷಯಗಳನ್ನು ವಿವರಿಸುವುದು, ಕಲಿಸುವುದು ಅಥವಾ ಅವರ ಪ್ರಶ್ನೆಗಳಿಗೆ ಉತ್ತರಿಸುವುದು ಸಾಮಾನ್ಯ. ಇತರರಿಗೆ ಕಲಿಸುವಾಗ ಸ್ವತಃ ಕಲಿತ ವಿಷಯವನ್ನು ಮತ್ತೊಮ್ಮೆ ಯೋಚಿಸಬೇಕಾಗುತ್ತದೆ. ಇದರಿಂದ ಹಿರಿಯ ಮಗುವಿನ ಕಲಿಕೆಯ ಪ್ರಕ್ರಿಯೆಯೂ ಬಲವಾಗಬಹುದು.
ಅಂದರೆ ಮಧ್ಯದ ಮಗು ಮತ್ತು ಕಿರಿಯ ಮಗು ಕಡಿಮೆ ಬುದ್ಧಿವಂತರು ಎಂದು ವಿಜ್ಞಾನ ಹೇಳುವುದಿಲ್ಲ. ಒಂದು ಕುಟುಂಬದಲ್ಲಿಯೇ ಕಿರಿಯ ಮಗು ತನ್ನ ಹಿರಿಯ ಸಹೋದರ-ಸಹೋದರಿಯರಿಗಿಂತ ಉತ್ತಮ ಶೈಕ್ಷಣಿಕ ಸಾಧನೆ ಮಾಡಬಹುದು. ಹಾಗೆಯೇ ಮಧ್ಯದ ಮಗು ಎಲ್ಲರಿಗಿಂತ ಹೆಚ್ಚು ಸೃಜನಶೀಲ ಅಥವಾ ಸಮಸ್ಯೆ ಪರಿಹರಿಸುವ ಸಾಮರ್ಥ್ಯ ಹೊಂದಿರಬಹುದು. ಹುಟ್ಟಿದ ಕ್ರಮವು ಒಂದು ಅಂಶ ಮಾತ್ರ. ಅದು ಮಗುವಿನ ಭವಿಷ್ಯವನ್ನು ನಿರ್ಧರಿಸುವ ನಿಯಮವಲ್ಲ.
ಪ್ರತಿಯೊಂದು ಮಗುವಿನೊಂದಿಗೆ ಪೋಷಕರ ವರ್ತನೆಯೂ ಬದಲಾಗುತ್ತದೆ. ಒಂದೇ ಕುಟುಂಬದಲ್ಲಿದ್ದರೂ ಪೋಷಕರ ಪೋಷಣೆಯ ವಿಧಾನ ಪ್ರತಿಯೊಂದು ಮಗುವಿನೊಂದಿಗೆ ಒಂದೇ ಆಗಿರುವುದಿಲ್ಲ. ಮೊದಲ ಮಗುವಿನ ಸಂದರ್ಭದಲ್ಲಿ ಪೋಷಕರು ಹೆಚ್ಚು ಎಚ್ಚರಿಕೆಯಿಂದಿರಬಹುದು. ಎರಡನೇ ಮಗುವಿನ ಸಂದರ್ಭದಲ್ಲಿ ಹೆಚ್ಚು ಅನುಭವಿಗಳಾಗಿರಬಹುದು. ಮೂರನೇ ಮಗುವಿನ ವೇಳೆಗೆ ಕೆಲವು ವಿಷಯಗಳನ್ನು ಹೆಚ್ಚು ಸಡಿಲವಾಗಿ ತೆಗೆದುಕೊಳ್ಳಬಹುದು.
ಈ ಸಣ್ಣ ವ್ಯತ್ಯಾಸಗಳು ಮಕ್ಕಳ ಆತ್ಮವಿಶ್ವಾಸ, ವರ್ತನೆ ಮತ್ತು ತಮ್ಮ ಬಗ್ಗೆ ಅವರ ಕಲ್ಪನೆಯ ಮೇಲೆ ಪರಿಣಾಮ ಬೀರಬಹುದು. ಹೀಗಾಗಿ ಮಕ್ಕಳ ಎದುರು ಒಂದೇ ರೀತಿಯಲ್ಲಿ ವರ್ತಿಸುವುದಕ್ಕಿಂತ ನ್ಯಾಯಯುತವಾಗಿ ವರ್ತಿಸುವುದು ಮುಖ್ಯ. ಪ್ರತಿಯೊಂದು ಮಗುವಿನ ಅಗತ್ಯವೂ ಬೇರೆ ಬೇರೆ ಆಗಿರಬಹುದು. ಅದನ್ನು ಅವರಿಗೆ ಅರ್ಥ ಮಾಡಿಸುವುದೂ ಅಗತ್ಯ.
Parenting Tips:ಮಕ್ಕಳಿಗೆ ಲೇಬಲ್ ಹಾಕಬೇಡಿ
ಪೋಷಕರು ಮಾಡುವ ದೊಡ್ಡ ತಪ್ಪುಗಳಲ್ಲಿ ಇದೂ ಒಂದು. "ಇವನು ನಮ್ಮ ಮನೆಯ ಬುದ್ಧಿವಂತ ಮಗು" "ಅವಳು ತುಂಬಾ ತುಂಟಿ" "ಇವನು ಓದುವುದರಲ್ಲಿ ವೀಕ್ "ಅವಳಿಗೆ ಗಣಿತ ಚೆನ್ನಾಗಿ ಬರುತ್ತದೆ" ಇಂತಹ ಲೇಬಲ್ಗಳು ಮಕ್ಕಳ ಮನಸ್ಸಿನ ಮೇಲೆ ಪರಿಣಾಮ ಬೀರಬಹುದು.
ಒಮ್ಮೆ ಒಂದು ಮಗುವಿಗೆ "ನೀನೇ ಬುದ್ಧಿವಂತ" ಎಂದು ನಿರಂತರವಾಗಿ ಹೇಳಿದರೆ, ಮತ್ತೊಂದು ಮಗುವಿಗೆ "ನಿನಗೆ ಓದು ಬರುವುದಿಲ್ಲ" ಎಂದು ಹೇಳಿದರೆ, ಇಬ್ಬರೂ ಆ ಗುರುತನ್ನು ತಮ್ಮ ಬಗ್ಗೆ ನಂಬಲು ಆರಂಭಿಸಬಹುದು. ಆದ್ದರಿಂದ ಮಗುವಿನ ವ್ಯಕ್ತಿತ್ವವನ್ನು ಒಂದು ಗುಣದಿಂದ ವ್ಯಾಖ್ಯಾನಿಸುವ ಬದಲು ಅದರ ಪ್ರಯತ್ನ, ಪ್ರಗತಿ ಮತ್ತು ವರ್ತನೆಯನ್ನು ಗುರುತಿಸುವುದು ಉತ್ತಮ.
"ಅಣ್ಣನಂತೆ ಓದು" "ಅಕ್ಕನಿಗೆ 90 ಅಂಕ ಬಂದಿದೆ, ನಿನಗೆ ಏಕೆ ಬರಲಿಲ್ಲ?" "ನಿನ್ನ ತಮ್ಮನನ್ನು ನೋಡು, ಅವನು ಎಷ್ಟು ಚೆನ್ನಾಗಿ ಮಾಡುತ್ತಾನೆ" ಇಂತಹ ಹೋಲಿಕೆಗಳು ಮಗುವಿನಲ್ಲಿ ಆತ್ಮವಿಶ್ವಾಸದ ಕೊರತೆ ಮತ್ತು ಅಸುರಕ್ಷಿತ ಭಾವನೆ ಮೂಡಿಸಬಹುದು. ಪ್ರತಿಯೊಂದು ಮಗುವಿನಲ್ಲೂ ಒಂದೊಂದು ವಿಶೇಷ ಸಾಮರ್ಥ್ಯವಿರುತ್ತದೆ. ಒಬ್ಬರಿಗೆ ಗಣಿತ ಇಷ್ಟವಾಗಬಹುದು, ಮತ್ತೊಬ್ಬರಿಗೆ ಸಂಗೀತ, ಇನ್ನೊಬ್ಬರಿಗೆ ಕ್ರೀಡೆ ಅಥವಾ ಚಿತ್ರಕಲೆ ಆಗಿರಬಹುದು. ಮಕ್ಕಳನ್ನು ಪರಸ್ಪರ ಹೋಲಿಸುವ ಬದಲು, ಅವರ ವೈಯಕ್ತಿಕ ಸಾಮರ್ಥ್ಯವನ್ನು ಗುರುತಿಸಿ ಬೆಳೆಸುವುದು ಮುಖ್ಯ.
ಹಾಗಾದರೆ IQಯನ್ನು ನಿಜವಾಗಿ ನಿರ್ಧರಿಸುವುದು ಏನು?
ಮಗುವಿನ ಬುದ್ಧಿಮತ್ತೆ ಕೇವಲ ಅದು ಕುಟುಂಬದಲ್ಲಿ ಎಷ್ಟನೇ ಮಗುವಾಗಿ ಹುಟ್ಟಿದೆ ಎಂಬುದರಿಂದ ನಿರ್ಧಾರವಾಗುವುದಿಲ್ಲ. ಶಿಕ್ಷಣ, ಪೌಷ್ಟಿಕತೆ, ಮನೆಯ ವಾತಾವರಣ, ಪೋಷಕರ ಬೆಂಬಲ, ಸ್ನೇಹಿತರ ಪ್ರಭಾವ (friendship), ಕಲಿಕೆಯ ಅವಕಾಶಗಳು, ವೈಯಕ್ತಿಕ ಆಸಕ್ತಿ ಮತ್ತು ಪ್ರೇರಣೆ ಸೇರಿದಂತೆ ಹಲವು ಅಂಶಗಳು ಮಗುವಿನ ಬೌದ್ಧಿಕ ಬೆಳವಣಿಗೆಯಲ್ಲಿ ಪಾತ್ರವಹಿಸುತ್ತವೆ.
ಮೊದಲ ಮಗು IQನಲ್ಲಿ ಸ್ವಲ್ಪ ಮುನ್ನಡೆ ಹೊಂದಿರಬಹುದು ಎಂಬುದಕ್ಕೆ ಕೆಲವು ಸಾಕ್ಷ್ಯಗಳಿವೆ. ಆದರೆ ಹುಟ್ಟಿದ ಕ್ರಮವು ಮಗುವಿನ ಬುದ್ಧಿಮತ್ತೆಗೆ ಅಂತಿಮ ತೀರ್ಪು ನೀಡುವುದಿಲ್ಲ. ಪ್ರತಿಯೊಂದು ಮಗುವಿಗೂ ತನ್ನದೇ ಆದ ಸಾಮರ್ಥ್ಯವಿದೆ. ಪೋಷಕರು ಅದನ್ನು ಗುರುತಿಸಿ, ಅದನ್ನು ಬೆಳೆಸಲು ಅವಕಾಶ ನೀಡಬೇಕು ಅಷ್ಟೆ.