ನಾಡಧ್ವಜಕ್ಕೆ ಕೇಂದ್ರ ಅಧಿಕೃತ ಮಾನ್ಯತೆ ನೀಡಲಿ: ಶಾಂತಲಿಂಗ ಸ್ವಾಮೀಜಿ ಆಗ್ರಹ

ನಾಡಧ್ವಜಕ್ಕೆ ಕೇಂದ್ರ ಅಧಿಕೃತ ಮಾನ್ಯತೆ ನೀಡಲಿ: ಶಾಂತಲಿಂಗ ಸ್ವಾಮೀಜಿ ಆಗ್ರಹ

ನರೇಗಲ್: ಕನ್ನಡಿಗರ ಪಾಲಿಗೆ ನಾಡಧ್ವಜ ಕೇವಲ ಬಾವುಟವಲ್ಲ. ಅದು ನಾಡಿನ ಅಸ್ಮಿತೆ ಮತ್ತು ಒಗ್ಗಟ್ಟಿನ ಪ್ರತೀಕವಾಗಿದ್ದು, ಕೇಂದ್ರ ಸರ್ಕಾರ ಅದಕ್ಕೆ ತಕ್ಷಣವೇ ಅಧಿಕೃತ ಮಾನ್ಯತೆ ನೀಡಬೇಕು’ ಎಂದು ಭೈರನಹಟ್ಟಿ–ಶಿರೋಳ ಮಠದ ಪೀಠಾಧಿಪತಿ ಶಾಂತಲಿಂಗ ಸ್ವಾಮೀಜಿ ಆಗ್ರಹಿಸಿದ್ದಾರೆ.

ಈ ಬಗ್ಗೆ ಪ್ರತಿಕಾ ಪ್ರಕಟಣೆ ನೀಡಿರುವ ಅವರು, ಕನ್ನಡಕ್ಕೊಂದು ನಾಡಗೀತೆ ಇರುವಂತೆ ಅಧಿಕೃತ ನಾಡಧ್ವಜವೂ ಇರಬೇಕೆಂಬುದು ಕನ್ನಡಿಗರ ಬಹುದಿನಗಳ ಬೇಡಿಕೆ. ಕೇಂದ್ರ ಸರ್ಕಾರ ಈ ಬೇಡಿಕೆ ಈಡೇರಿಸಬೇಕು ಎಂದು ಒತ್ತಾಯಿಸಿದ್ದಾರೆ.

’1960ರ ದಶಕದಲ್ಲಿ ಬಳಕೆಗೆ ಬಂದ ಈ ಧ್ವಜವು ಕನ್ನಡಪರ ಹೋರಾಟಗಳೊಂದಿಗೆ ಬೆಸೆದುಕೊಂಡಿದೆ. ಗೋಕಾಕ್ ಚಳವಳಿ ಸೇರಿದಂತೆ ಕನ್ನಡ ನಾಡು–ನುಡಿಯ ಹೋರಾಟಗಳು, ಉತ್ಸವಗಳು ಹಾಗೂ ವಿವಿಧ ಕಾರ್ಯಕ್ರಮಗಳಲ್ಲಿ ಧ್ವಜವನ್ನು ಬಳಸುತ್ತಾ ಬರಲಾಗಿದೆ. ಕಾಲ ಬದಲಾದರೂ ಕನ್ನಡಿಗರ ಭಾವನಾತ್ಮಕ ನಂಟು ಈ ಧ್ವಜದೊಂದಿಗೆ ಮುಂದುವರಿದಿದೆ’ ಎಂದು ಅವರು ತಿಳಿಸಿದ್ದಾರೆ.

ರಾಜ್ಯಕ್ಕೆ ಪ್ರತ್ಯೇಕ ನಾಡಧ್ವಜದ ಅಧಿಕೃತ ಮಾನ್ಯತೆ ನೀಡುವ ವಿಚಾರದಲ್ಲಿ ಕೇಂದ್ರ ಸರ್ಕಾರ ಸ್ಪಷ್ಟ ನಿರ್ಧಾರ ಕೈಗೊಳ್ಳಬೇಕು. ರಾಷ್ಟ್ರಧ್ವಜಕ್ಕೆ ಅತ್ಯುನ್ನತ ಗೌರವ ನೀಡುವುದರೊಂದಿಗೆ ಅದರ ಕೆಳಗೆ ನವೆಂಬರ್‌ 1 ರಂದು ನಾಡಧ್ವಜವನ್ನು ಹಾರಿಸಲು ಅಧಿಕೃತ ಅವಕಾಶ ಕಲ್ಪಿಸಬೇಕು’ ಎಂದು ಅವರು ಆಗ್ರಹಿಸಿದ್ದಾರೆ.