ನಿಮ್ಮೊಂದಿಗೆ ನಾವಿದ್ದೇವೆ... ಚಿನ್ನದ ಹುಡುಗಿ ಪೂವಮ್ಮ ಭೇಟಿಯಾದ ನಟ ಶೈನ್ ಶೆಟ್ಟಿ
ಇತ್ತೀಚೆಗೆ ನಡೆದ ಏಷ್ಯನ್ ಗೇಮ್ಸ್‌ನಲ್ಲಿ ಕರ್ನಾಟಕದ ಹೆಮ್ಮೆಯ ಕ್ರೀಡಾಪಟು ಎಂ. ಆರ್. ಪೂವಮ್ಮ (ಮಾಚೆಟ್ಟಿರ ರಾಜು ಪೂವಮ್ಮ) ಅವರು ಅದ್ಭುತ ಸಾಧನೆ ಮಾಡಿದ್ದರು. ಜಪಾನ್‌ನ ಐಚಿ-ನಗೋಯಾದಲ್ಲಿ ನಡೆದ 2026ರ ಏಷ್ಯನ್ ಗೇಮ್ಸ್‌ನಲ್ಲಿ ಅವರು ಭಾರತದ ಮಹಿಳಾ 4x400 ಮೀಟರ್ ರಿಲೆ ತಂಡದ ಭಾಗವಾಗಿ ಚಿನ್ನದ ಪದಕ ಗೆದ್ದುಕೊಂಡಿದ್ದರು.
ಏಷ್ಯನ್ ಗೇಮ್ಸ್‌ನಲ್ಲಿ ಚಿನ್ನ ಗೆದ್ದ ಪೂವಮ್ಮ ಅವರನ್ನು ಕನ್ನಡದ ನಟ, ಬಿಗ್ ಬಾಸ್ ಮಾಜಿ ಸ್ಪರ್ಧಿ ಶೈನ್ ಶೆಟ್ಟಿ ಅವರು ಭೇಟಿಯಾಗಿ ಸನ್ಮಾನಿಸಿದ್ದಾರೆ. ಪೂವಮ್ಮ ಅವರನ್ನು ಭೇಟಿಯಾದ ಫೋಟೊಗಳನ್ನು ಇನ್‌ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿರುವ ಶೈನ್ ಶೆಟ್ಟಿ, ‘ಭಾರತಕ್ಕೆ ಚಿನ್ನ ತಂದಿರಿ ಪೂವಮ್ಮ . ಒಬ್ಬ ಕನ್ನಡತಿ ಗೆದ್ದರೆ ಕೋಟಿ ಕೋಟಿ ಕನ್ನಡಿಗರು ಗೆದ್ದಂತೆ. ಎಲ್ಲ ಭಾರತೀಯರಿಗೂ ಕನ್ನಡಿಗರಿಗೂ ನಿಮ್ಮ ಮೇಲೆ ಅಪಾರವಾದ ಗೌರವ ಹಾಗೂ ಹೆಮ್ಮೆ ಇದೆ. ನಿಮ್ಮೊಂದಿಗೆ ನಾವಿದ್ದೇವೆ. ಚಿನ್ನದ ಪದಕ ಗೆಲ್ಲುವ ಮೂಲಕ ದೇಶದ ಜನರ ಗಮನ ಸೆಳೆದಿರುವ ನಿಮಗೆ, ಹೃದಯಪೂರ್ವಕ ಅಭಿನಂದನೆಗಳು’ ಎಂದು ಬರೆದುಕೊಂಡಿದ್ದಾರೆ.
ಇತ್ತೀಚೆಗೆ ಏಷ್ಯನ್ ಗೇಮ್ಸ್‌ನಲ್ಲಿ ಪದಕ ಗೆದ್ದ ಇತರ ರಾಜ್ಯದ ಕ್ರೀಡಾಪಟುಗಳಿಗೆ ಅಲ್ಲಿನ ರಾಜ್ಯ ಸರ್ಕಾರಗಳು ಕೋಟಿಗಟ್ಟಲೆ ಮೊತ್ತದ ಬಹುಮಾನ ಘೋಷಿಸಿವೆ. ಕರ್ನಾಟಕ ಸರ್ಕಾರ ಇನ್ನೂ ಬೆಂಬಲ ಪ್ರಕಟಿಸದೇ ಇರುವುದು ಬೇಸರ ಉಂಟು ಮಾಡಿದೆ ಎಂದು ಎಂ.ಆರ್ ಪೂವಮ್ಮ ಹೇಳಿದ್ದರು. ಆ ಬೆನ್ನಲ್ಲೇ ನಟ ಶೈನ್ ಶೆಟ್ಟಿ ಅವರು ಪೂವಮ್ಮ ಅವರನ್ನು ಭೇಟಿಯಾಗಿ ಸನ್ಮಾನ ಮಾಡಿದ್ದಾರೆ.
ಇನ್ನು, ನಟ ಶೈನ್ ಶೆಟ್ಟಿ ಅವರು ಪೂವಮ್ಮರನ್ನು ಸನ್ಮಾನಿಸಿದ ಫೋಟೊಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿವೆ. ಈ ಫೋಟೊಗಳನ್ನು ನೋಡಿದ ನೆಟ್ಟಿಗರು, ‘ಭಾರತದ ಮಗಳ ಬಗ್ಗೆ ತುಂಬಾ ಹೆಮ್ಮೆ ಇದೆ. ಜೀವನದಲ್ಲಿ ನಿಮ್ಮ ಎಲ್ಲಾ ಆಸೆಗಳು ಈಡೇರಲಿ’, ‘ಚಿನ್ನದ ಹುಡುಗಿ ಪೂವಮ್ಮ ಅವರಿಗೆ ಅಭಿನಂದನೆಗಳು’ ಎಂದು ಕಮೆಂಟ್ ಮೂಲಕ ಶುಭ ಹಾರೈಸಿದ್ದಾರೆ.