ಮುಳಬಾಗಿಲು: ಮತದಾರರ ಪಟ್ಟಿಯ ಪರಿಷ್ಕರಣೆ ವೇಳೆ ಬಿಎಲ್ಒ ಬಾರದಿದ್ದರಿಂದ ಆಕ್ರೋಶ
ಮುಳಬಾಗಿಲು: ಮತದಾರರ ಪಟ್ಟಿಯ ಪರಿಷ್ಕರಣೆ ವೇಳೆ ತಿದ್ದುಪಡಿ ಮತ್ತಿತರ ಕಾರಣಗಳಿಗಾಗಿ ನೋಟಿಸ್ ಪಡೆದಿದ್ದ ಮತದಾರರು ದಾಖಲೆ ಒದಗಿಸಲು ಕಾದುಕುಳಿತರೂ ಬಿಎಲ್ಒ ಬಾರದಿದ್ದರಿಂದ ಬೇಸತ್ತ ಮತದಾರರು ಶುಕ್ರವಾರ ಆಕ್ರೋಶ ವ್ಯಕ್ತಪಡಿಸಿದರು.
ನಗರದ 112 ಮತಗಟ್ಟೆ ಸಂಖ್ಯೆಯ ಅಂಬೇಡ್ಕರ್ ಕಾಲೊನಿ, ಹೊಸ ಎಡಿ ಕಾಲೊನಿಯ 60 ಮತದಾರರಿಗೆ ದಾಖಲೆ ಒದಗಿಸಿ, ಕ್ಷೇತ್ರ ಶಿಕ್ಷಣಾಧಿಕಾರಿ ಕಚೇರಿಯಲ್ಲಿ ಮತದಾರರ ಪಟ್ಟಿಯಲ್ಲಿ ಸೇರ್ಪಡೆ ಮಾಡಿಕೊಳ್ಳುವಂತೆ ಆಯೋಗ ನೋಟಿಸ್ ನೀಡಿತ್ತು.
ನೋಟಿಸ್ ಸ್ವೀಕರಿಸಿದ ಮತದಾರರು ದಾಖಲೆಗಳೊಂದಿಗೆ ಬಿಇಒ ಕಚೇರಿಗೆ ಬಂದಿದ್ದರು. ಬೆಳಗ್ಗೆಯಿಂದ ಕಚೇರಿ ಬಳಿ ಕಾಯುತ್ತಾ ಕುಳಿತಿದ್ದರೂ ಬಿಎಲ್ಒ ಹರೀಶ್ ನಿಗದಿತ ಸ್ಥಳಕ್ಕೆ ಬರಲಿಲ್ಲ. ಮಧ್ಯಾಹ್ನ ಅಧಿಕಾರಿಯ ಮೊಬೈಲ್ ಫೋನ್ಗೆ ಕರೆ ಮಾಡಿದರೂ ಸ್ವೀಕರಿಸದಿದ್ದರಿಂದ ತೀವ್ರ ಆಕ್ರೋಶ ವ್ಯಕ್ತಪಡಿಸಿದರು.
ಜಿಲ್ಲಾ ಎಸ್ಐಆರ್ ಅಧಿಕಾರಿ ಬಿ.ಕೆ.ಸಂಜಯ್, ವರದರಾಜು ಸ್ಥಳಕ್ಕೆ ಭೇಟಿ ನೀಡಿ, ಮತದಾರರ ಆಕ್ರೋಶ ಶಮನಗೊಳಿಸಲು ಯತ್ನಿಸಿದರು. ಬಿಎಲ್ಒ ಹರೀಶ್ಗೆ ಫೋನ್ ಮಾಡಿದಾಗ ಆಸ್ಪತ್ರೆಗೆ ದಾಖಲಾಗಿರುವುದಾಗಿ ಹೇಳಿದ್ದರಿಂದ, ಪರ್ಯಾಯ ವ್ಯವಸ್ಥೆ ಮಾಡಿದರು.
ಮತದಾರರನ್ನು ಕಾಯಿಸಿದ ಅಧಿಕಾರಿ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದರು.