ಸಾರಿಗೆ ನಿಗಮಗಳ ನಷ್ಟದ ನೆಪ ಹೇಳಿ ಪ್ರಯಾಣ ದರ ಏರಿಸಿದ ಸರ್ಕಾರ
ಬೆಂಗಳೂರು: ಕೆಎಸ್‌ಆರ್‌ಟಿಸಿ ಬಸ್ ಪ್ರಯಾಣದ ಟಿಕೆಟ್‌ ದರವನ್ನು ಶೇ 23ರಷ್ಟು ಮತ್ತು ಬಿಎಂಟಿಸಿ ಟಿಕೆಟ್‌ ದರವನ್ನು ಶೇ 35ರಷ್ಟು ಏರಿಸಿ ರಾಜ್ಯ ಸರ್ಕಾರ ಬುಧವಾರ ಆದೇಶ ಹೊರಡಿಸಿದೆ. ಪರಿಷ್ಕೃತ ದರ ಇಂದು ರಾತ್ರಿ ಇಂದಲೇ ಜಾರಿಗೆ ಬರಲಿದೆ.
ಸಾರಿಗೆ ಸಚಿವ ಬೈರತಿ ಸುರೇಶ್ ಅವರು ಮಾಧ್ಯಮಗೋಷ್ಠಿಯಲ್ಲಿ ಈ ವಿಚಾರ ತಿಳಿಸಿದ್ದಾರೆ.
ರಾಜ್ಯದ ನಾಲ್ಕೂ ಸಾರಿಗೆ ನಿಗಮಗಳು ನಷ್ಟ ಅನುಭವಿಸುತ್ತಿದ್ದು, ಬಸ್ ಪ್ರಯಾಣ ದರ ಏರಿಕೆ ಮಾಡುವುದು ಅನಿವಾರ್ಯವಾಗಿದೆ ಎಂದು ಈಚೆಗೆ ಸಚಿವ ಸಂಪುಟ ಸಭೆಯಲ್ಲಿ ತೀರ್ಮಾನ ಕೈಗೊಳ್ಳಲಾಗಿತ್ತು. ಅದರಂತೆ ದರ ಪರಿಷ್ಕರಣೆ ಮಾಡಲಾಗಿದೆ.
ಈಚೆಗಷ್ಟೇ ಹಾಲಿನ ದರ ಹೆಚ್ಚಳವಾಗಿರುವುದರಿಂದ, ಜನಸಾಮಾನ್ಯರ ಮೇಲೆ ಮತ್ತಷ್ಟು ಹೊರೆಯಾಗಲಿದೆ.
ಬಿಎಂಟಿಸಿ ಬಸ್ ಟಿಕೆಟ್‌ ದರದ ಕನಿಷ್ಠ ಮೊತ್ತವನ್ನು ₹ 6ರಿಂದ ₹ 10ಕ್ಕೆ ಹಾಗೂ ಗರಿಷ್ಠ ದರವನ್ನು ₹ 35ರಿಂದ ₹ 40ಕ್ಕೆ ಏರಿಸಲಾಗಿದೆ. ಬಿಎಂಟಿಸಿಯ ವಾಯುವಜ್ರ ಬಸ್ ಪ್ರಯಾಣದ ಕನಿಷ್ಠ ದರವನ್ನು ₹ 15ರಿಂದ ₹ 20ಕ್ಕೆ, ಗರಿಷ್ಠ ದರವನ್ನು ₹ 75ರಿಂದ ₹ 90ಕ್ಕೆ ಹೆಚ್ಚಿಸಲಾಗಿದೆ.