Breakup Leave: ಬ್ರೇಕಪ್ ಆದ್ರೆ 7 ದಿನ ಪೇಯ್ಡ್ ಲೀವ್! ಬೆಂಗಳೂರಿನ ಕಂಪನಿಯ ಹೊಸ ಪಾಲಿಸಿ ಭಾರೀ ಚರ್ಚೆ
ಬೆಂಗಳೂರು: ಉದ್ಯೋಗಿಗಳ ವೈಯಕ್ತಿಕ ಜೀವನ ಹಾಗೂ ಭಾವನಾತ್ಮಕ ಕ್ಷೇಮಕ್ಕೂ ಮಹತ್ವ ನೀಡುವ ಹೊಸ ರೀತಿಯ ವರ್ಕ್ಪ್ಲೇಸ್ ಕಲ್ಚರ್ ಇದೀಗ ಗಮನ ಸೆಳೆಯುತ್ತಿದೆ. ಬೆಂಗಳೂರಿನಲ್ಲಿ ಪ್ರಧಾನ ಕಚೇರಿ ಹೊಂದಿರುವ ಫಿನ್ಟೆಕ್ ಕಂಪನಿ StockGro ಉದ್ಯೋಗಿಗಳಿಗೆ ಸಂಬಂಧ ಮುರಿದುಬಿದ್ದ ಸಂದರ್ಭದಲ್ಲಿ ಗರಿಷ್ಠ 7 ದಿನಗಳ ವೇತನ ಸಹಿತ 'Breakup Leave' ನೀಡುತ್ತಿದೆ ಎಂದು ವರದಿಯಾಗಿದೆ.
ಈ ನೀತಿಯನ್ನು ಕಂಪನಿಯು 2024ರಲ್ಲಿ ಪರಿಚಯಿಸಿದೆ ಎನ್ನಲಾಗಿದ್ದು, ಪ್ರೇಮ ಸಂಬಂಧ ಅಂತ್ಯಗೊಳ್ಳುವುದು ಮಾತ್ರವಲ್ಲದೆ ವಿಚ್ಛೇದನದಂತಹ ಸಂದರ್ಭಗಳಿಗೂ ಈ ರಜೆ ಅನ್ವಯಿಸುತ್ತದೆ ಎಂದು ವರದಿಗಳು ತಿಳಿಸಿವೆ. ವಿಶೇಷವೆಂದರೆ, ರಜೆ ಪಡೆಯಲು ಉದ್ಯೋಗಿಗಳು ಸಂಬಂಧ ಮುರಿದಿರುವುದಕ್ಕೆ ಯಾವುದೇ ದಾಖಲೆ ಅಥವಾ ಪುರಾವೆ ಸಲ್ಲಿಸುವ ಅಗತ್ಯವಿಲ್ಲ ಎನ್ನಲಾಗಿದೆ.
Breakup Leave:ಭಾವನಾತ್ಮಕ ಆರೋಗ್ಯಕ್ಕೂ ಮಹತ್ವ
ಸಾಮಾನ್ಯವಾಗಿ ಕಂಪನಿಗಳಲ್ಲಿ ಅನಾರೋಗ್ಯ, ಕುಟುಂಬದ ತುರ್ತು ಪರಿಸ್ಥಿತಿ, ಶೋಕಾಚರಣೆ ಸೇರಿದಂತೆ ಹಲವು ಸಂದರ್ಭಗಳಿಗೆ ರಜೆ ನೀಡಲಾಗುತ್ತದೆ. ಆದರೆ ವೈಯಕ್ತಿಕ ಸಂಬಂಧ ಮುರಿದುಬಿದ್ದಾಗ ಉಂಟಾಗುವ ಭಾವನಾತ್ಮಕ ಒತ್ತಡಕ್ಕೆ ಪ್ರತ್ಯೇಕ ರಜೆ ನೀಡುವುದು ಅಪರೂಪ.
ಬ್ರೇಕಪ್ ಅಥವಾ ವಿಚ್ಛೇದನವು ವ್ಯಕ್ತಿಯ ವೈಯಕ್ತಿಕ ಜೀವನದ ಮೇಲೆ ಮಾತ್ರವಲ್ಲದೆ ಕೆಲಸದ ಮೇಲೂ ಪರಿಣಾಮ ಬೀರುವ ಸಾಧ್ಯತೆಯಿದೆ. ನಿದ್ರೆಯ ಕೊರತೆ, ಏಕಾಗ್ರತೆಯ ಸಮಸ್ಯೆ, ಕೆಲಸದ ಮೇಲಿನ ಆಸಕ್ತಿ ಕಡಿಮೆಯಾಗುವುದು, ಮಾನಸಿಕ ಒತ್ತಡ ಹಾಗೂ ಉತ್ಪಾದಕತೆ ಕುಸಿತದಂತಹ ಸಮಸ್ಯೆಗಳು ಎದುರಾಗಬಹುದು.
Breakup Leave:ವೃತ್ತಿಪರ ಬದುಕಿಗೆ ಸಹಾಯಕ
ಹೀಗಾಗಿ ಉದ್ಯೋಗಿ ಕಚೇರಿಯಲ್ಲಿ ಎಂಟು ಗಂಟೆಗಳ ಕಾಲ ಕೆಲಸ ಮಾಡುತ್ತಿದ್ದರೂ, ಅವರ ಮನಸ್ಸು ಸಂಪೂರ್ಣವಾಗಿ ಕೆಲಸದಲ್ಲಿ ತೊಡಗಿಸಿಕೊಂಡಿರದ ಪರಿಸ್ಥಿತಿ ಎದುರಾಗಬಹುದು. ಇಂತಹ ಸಂದರ್ಭದಲ್ಲಿ ಸ್ವಲ್ಪ ಸಮಯವನ್ನು ಚೇತರಿಕೆಗೆ ಬಳಸಿಕೊಳ್ಳಲು ಅವಕಾಶ ನೀಡುವುದು ಉದ್ಯೋಗಿಯ ವೈಯಕ್ತಿಕ ಹಾಗೂ ವೃತ್ತಿಪರ ಬದುಕಿಗೆ ಸಹಾಯಕವಾಗಬಹುದು ಎಂಬುದು ಈ ನೀತಿಯ ಹಿಂದಿರುವ ಆಲೋಚನೆ.
'ಎಮೋಷನಲ್ ವೆಲ್-ಬೀಯಿಂಗ್'ಗೂ ರಜೆ ಬೇಕೇ?
StockGroನ ಈ ನೀತಿ ಮತ್ತೊಂದು ಪ್ರಮುಖ ಪ್ರಶ್ನೆಯನ್ನು ಹುಟ್ಟುಹಾಕಿದೆ. ಉದ್ಯೋಗಿಗಳ ಭಾವನಾತ್ಮಕ ಆರೋಗ್ಯಕ್ಕೂ ದೈಹಿಕ ಆರೋಗ್ಯದಷ್ಟೇ ಮಹತ್ವ ನೀಡಬೇಕೇ? ಇತ್ತೀಚಿನ ವರ್ಷಗಳಲ್ಲಿ ಹಲವು ಸಂಸ್ಥೆಗಳು ಉದ್ಯೋಗಿಗಳ ಮಾನಸಿಕ ಆರೋಗ್ಯ ಮತ್ತು ಕೆಲಸ-ವೈಯಕ್ತಿಕ ಜೀವನದ ಸಮತೋಲನಕ್ಕೆ ಹೆಚ್ಚಿನ ಗಮನ ನೀಡುತ್ತಿವೆ. ಇದರ ಭಾಗವಾಗಿ ಮೆಂಟಲ್ ಹೆಲ್ತ್ ಡೇ, ವೆಲ್ನೆಸ್ ಪ್ರೋಗ್ರಾಂಗಳು ಸೇರಿದಂತೆ ಹಲವು ಸೌಲಭ್ಯಗಳನ್ನು ಕಂಪನಿಗಳು ಪರಿಚಯಿಸುತ್ತಿವೆ.
ಈ ಹಿನ್ನೆಲೆಯಲ್ಲಿ ಬ್ರೇಕಪ್ ಲೀವ್ ಕೂಡ ಉದ್ಯೋಗಿಗಳ ಭಾವನಾತ್ಮಕ ಅಗತ್ಯಗಳನ್ನು ಪರಿಗಣಿಸುವ ವಿಭಿನ್ನ ಹೆಜ್ಜೆಯಾಗಿ ಕಾಣಿಸಿಕೊಂಡಿದೆ. ಆದರೆ ಪ್ರತಿಯೊಬ್ಬ ಉದ್ಯೋಗಿಗೂ ಏಳು ದಿನಗಳ ರಜೆ ಅಗತ್ಯವಿರಬೇಕೆಂದಿಲ್ಲ. ವೈಯಕ್ತಿಕ ಸಮಸ್ಯೆಗಳಿಗೆಲ್ಲ ಪ್ರತ್ಯೇಕ ರಜೆ ನೀತಿ ರೂಪಿಸುವುದು ಸಾಧ್ಯವೂ ಅಲ್ಲ. ಆದರೂ ಜೀವನದಲ್ಲಿ ದೊಡ್ಡ ಬದಲಾವಣೆ ಸಂಭವಿಸಿದಾಗ ಸ್ವಲ್ಪ ಸಮಯ ತೆಗೆದುಕೊಂಡು ತಮ್ಮನ್ನು ತಾವು ನಿಭಾಯಿಸಿಕೊಳ್ಳಲು ಅವಕಾಶ ನೀಡುವುದು ಆರೋಗ್ಯಕರ ಕೆಲಸದ ವಾತಾವರಣದ ಭಾಗವಾಗಬಹುದು ಎಂಬ ಚರ್ಚೆ ಆರಂಭವಾಗಿದೆ