ನರಗುಂದದಲ್ಲಿ ಅಧಿಕಾರಿಗಳ ಸೋಗಿನಲ್ಲಿ ವಂಚನೆ ಪ್ರಕರಣ: ಇಬ್ಬರ ಬಂಧನ
ನರಗುಂದ: ಪೊಲೀಸ್ ಹಾಗೂ ಆಹಾರ ಇಲಾಖೆ ಅಧಿಕಾರಿಗಳ ಸೋಗಿನಲ್ಲಿ ವ್ಯಕ್ತಿಯನ್ನು ಬೆದರಿಸಿ, ಬಲವಂತವಾಗಿ ₹80,000 ಪಡೆದಿದ್ದ ಪ್ರಕರಣದಲ್ಲಿ ಪಟ್ಟಣದ ನಿವಾಸಿಗಳಾದ ದುರಗಪ್ಪ ಜಮಖಂಡಿ, ರಫೀಕ ಲೋದಿ ಎಂಬುವರನ್ನು ಸ್ಥಳೀಯ ಪೊಲೀಸರು ಬಂಧಿಸಿದ್ದಾರೆ. ಮತ್ತೊಬ್ಬ ಆರೋಪಿ ವಾಸನ ಗ್ರಾಮದ ಕಿರಣ ಮೂಲಿಮನಿ ತಲೆಮರೆಸಿಕೊಂಡಿದ್ದಾನೆ ಎಂದು ತಿಳಿಸಿದ್ದಾರೆ.
ನಡೆದಿದ್ದೇನು?: ಜುಲೈ 8ರಂದು ಹದಲಿ ಗ್ರಾಮದ ರಮೇಶ ದಾಸರ ಎಂಬುವರು ಹದಲಿ ಗ್ರಾಸ್ ಬಳಿ ನಿಂತಿದ್ದಾಗ, ಅಕ್ರಮವಾಗಿ ಪಡಿತರ ಅಕ್ಕಿ ತುಂಬಲು ಹೊರಟಿದ್ದೀಯ ಎಂದು ಮೂವರು ಆರೋಪಿಗಳು ಹೆದರಿಸಿ, ಹಲ್ಲೆ ನಡೆಸಿದ್ದಾರೆ.
ಪ್ರಕರಣ ಮುಚ್ಚಿಹಾಕುವುದಾಗಿ ಹೇಳಿ ₹20 ಸಾವಿರ ನಗದು ಕಿತ್ತುಕೊಂಡು, ರಮೇಶ ಅವರ ಮೊಬೈಲ್ ಫೋನ್ ಕಸಿದು ಅವರ ಫೋನ್ ಪೇ ಖಾತೆಯಿಂದ ₹30 ಸಾವಿರ, ಅವರ ಸ್ನೇಹಿತನ ಮೂಲಕ ₹30 ಸಾವಿರ ಫೋನ್ಪೇ ಮಾಡಿಸಿಕೊಂಡಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ.
ಪ್ರಕರಣ ಸಂಬಂಧ ಸೆ.15ರಂದು ನರಗುಂದ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿತ್ತು. ಡಿವೈಎಸ್ಪಿ ಪ್ರಭುಗೌಡ ಕಿರೇದಹಳ್ಳಿ ಮಾರ್ಗದರ್ಶನದಲ್ಲಿ ಕಾರ್ಯಾಚರಣೆ ನಡೆಸಿದೆ.