ತಲೆಮರೆಸಿಕೊಂಡಿದ್ದ ಇಸ್ರೇಲ್ನ ಮಾದಕವಸ್ತು ವ್ಯಾಪಾರಿ ಅಟಾಲಾ ಶರಣು
ಪಣಜಿ (ಪಿಟಿಐ): ತಲೆಮರೆಸಿಕೊಂಡಿದ್ದ ಇಸ್ರೇಲ್ನ ಮಾದಕವಸ್ತು ವ್ಯಾಪಾರಿ ಯಾನೀವ್ ಬೆನಿಮ್ ಅಲಿಯಾಸ್ ಅಟಾಲಾ ಬುಧವಾರ ಇಲ್ಲಿನ ನ್ಯಾಯಾಲಯದ ಮುಂದೆ ಶರಣಾದರು. ಮಾದಕವಸ್ತುಗಳ ಮಾರಾಟದ ಪ್ರಕರಣದಲ್ಲಿ ಆರೋಪಿಯನ್ನು 30 ದಿನಗಳ ಕಾಲ ನ್ಯಾಯಾಂಗ ವಶಕ್ಕೆ ಒಪ್ಪಿಸಲಾಗಿದೆ.
ಅಟಾಲಾ ಅವರ ವಿರುದ್ಧ ಜಾಮೀನು ರಹಿತ ವಾರಂಟ್ ಹಾಗೂ ಲುಕ್–ಔಟ್ ಸುತ್ತೋಲೆ ಹೊರಡಿಸಲಾಗಿತ್ತು. ಸೆಪ್ಟೆಂಬರ್ 16ರ ಒಳಗಾಗಿ ನ್ಯಾಯಾಲಯದ ಮುಂದೆ ಶರಣಾಗುವಂತೆ ಬಾಂಬೆ ಹೈಕೋರ್ಟ್ನ ಗೋವಾ ಪೀಠವು ಗಡುವು ವಿಧಿಸಿತ್ತು. ಇದರ ಬೆನ್ನಲ್ಲೇ, ಉತ್ತರ ಗೋವಾದ ಮರ್ಸೆಸ್ನಲ್ಲಿರುವ ನ್ಯಾಯಾಲಯದ ಮುಂದೆ ಬುಧವಾರ ಮಧ್ಯಾಹ್ನ ಶರಣಾದರು.
ಅಟಾಲಾ ಸಲ್ಲಿಸಿರುವ ಜಾಮೀನು ಅರ್ಜಿಯು ಬಾಂಬೆ ಹೈಕೋರ್ಟ್ನಲ್ಲಿ ವಿಚಾರಣೆಗೆ ಬಾಕಿಯಿದೆ. ಸೆಪ್ಟೆಂಬರ್ 21ರಂದು ಈ ಅರ್ಜಿಯ ವಿಚಾರಣೆ ನಡೆಯಲಿದೆ.
Tags
Nation