ಮುಳಬಾಗಿಲು ಶಾಲಾ ಆವರಣದಲ್ಲಿ ಮದ್ಯಪಾನ: ಹರಿದಾಡಿದ ವಿಡಿಯೊ
ಮುಳಬಾಗಿಲು: ತಾಲ್ಲೂಕಿನ ಎನ್.ಚೌಡೇನಹಳ್ಳಿ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲಾ ಆವರಣದಲ್ಲಿ ಬುಧವಾರ ರಾತ್ರಿ ಕೆಲ ಪುಂಡರು ಮದ್ಯಪಾನ ಮಾಡುತ್ತಿದ್ದ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡಿದೆ.
ಶಾಲಾ ಆವರಣದಲ್ಲಿ ಕೆಲವರು ರಾಜಾರೋಷವಾಗಿ ಮದ್ಯಪಾನ ಮಾಡುತ್ತಿದ್ದರು. ಇದನ್ನು ಗ್ರಾಮಸ್ಥರು ಪ್ರಶ್ನಿಸಿದರು ಲೆಕ್ಕಕ್ಕೆ ತೆಗೆದುಕೊಳ್ಳದೆ ಮದ್ಯಪಾನ ಸೇವಿಸುತ್ತಿದ್ದರು. ಹಾಗಾಗಿ ಇದರಿಂದ ಬೇಸತ್ತ ಗ್ರಾಮಸ್ಥರು ವಿಡಿಯೊ ಮಾಡಿ ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಟ್ಟು, ಕಾನೂನು ಕ್ರಮಕ್ಕೆ ಒತ್ತಾಯಿಸಿದ್ದಾರೆ.
ಶಾಲಾ ಆವರಣದಲ್ಲಿ ಮದ್ಯಪಾನ ಮಾಡುತ್ತಿರುವ ವಿಡಿಯೊ ನೋಡಿದೆ. ಆದರೆ, ನಾನು ಶಾಲೆಗೆ ಹೋಗುವ ಮುನ್ನವೇ ವಿದ್ಯಾರ್ಥಿಗಳು ಶಾಲಾ ಆವರಣದ ಕಸ ಗುಡಿಸಿ ಹೊರ ಹಾಕಿರುತ್ತಾರೆ. ಹಾಗಾಗಿ ಮದ್ಯಪಾನ ಕುಡಿತದ ಬಗ್ಗೆ ನನ್ನ ಗಮನಕ್ಕೆ ಬಂದಿಲ್ಲ ಎಂದು ಶಾಲಾ ಶಿಕ್ಷಕ ಚಂದ್ರಪ್ಪ ಸಮಜಾಯಿಷಿ ನೀಡಿದರು.