ಜೇಬಿನಲ್ಲಿ ಒಂದು ರೂಪಾಯಿ ಕ್ಯಾಶ್ ಇಲ್ಲದಿದ್ರೂ ವಿದೇಶದಲ್ಲಿ ಸುಲಭವಾಗಿ ಮಾಡಬಹುದು ಶಾಪಿಂಗ್! ಇದು ಭಾರತೀಯ UPI ಕಮಾಲ್
ವಿದೇಶ ಪ್ರವಾಸ ಮಾಡುವಾಗ ಪೇಮೆಂಟ್ ಮಾಡುವುದೇ ಒಂದು ದೊಡ್ಡ ಸಮಸ್ಯೆ. ಹಿಂದೆ, ವಿದೇಶಕ್ಕೆ ಹೋಗುವಾಗ ಜನರು ನಗದು ವಿನಿಮಯ ಮಾಡಿಕೊಳ್ಳಬೇಕಾಗಿತ್ತು ಅಥವಾ ಅಂತರರಾಷ್ಟ್ರೀಯ ಕಾರ್ಡ್ಗಳನ್ನು ಬಳಸಬೇಕಾಗಿತ್ತು. ಆದರೆ ಈಗ ಹಾಗಲ್ಲ, ಭಾರತೀಯರಿಗೆ ಫಾರಿನ್ ಟೂರ್ಗಳು ಹೆಚ್ಚು ಸುಲಭವಾಗಿರಲಿದೆ. ಅನೇಕ ದೇಶಗಳು ಈಗ UPI ಮೂಲಕ ನೇರ ಮೊಬೈಲ್ ಪಾವತಿಗಳನ್ನು ನೀಡುತ್ತವೆ. ಹಾಗಾಗಿ, ಶಾಪಿಂಗ್, ಹೋಟೆಲ್ ಬಿಲ್, ರೆಸ್ಟೋರೆಂಟ್ಗಳಲ್ಲಿನ ಪೇಮೆಂಟ್ ಸುಲಭವಾಗಿ ಮುಗಿದು ಬಿಡುತ್ತದೆ.
ಶೀಘ್ರದಲ್ಲೇ, ಸ್ಪೇನ್ನಲ್ಲಿ ಕೂಡಾ ಭಾರತೀಯರು UPI ಬಳಸಿ ಸುಲಭವಾಗಿ ಪೇಮೆಂಟ್ಗಳನ್ನು ಮಾಡಬಹುದಾಗಿದೆ. ಹೋಟೆಲ್ಗಳು, ರೆಸ್ಟೋರೆಂಟ್ಗಳು, ಕೆಫೆಗಳು ಮತ್ತು ಅಂಗಡಿಗಳಲ್ಲಿ QR ಕೋಡ್ ಅನ್ನು ಸ್ಕ್ಯಾನ್ ಮಾಡುವ ಮೂಲಕ ಸುಲಭವಾಗಿ ಬಿಲ್ ಪಾವತಿ ಮಾಡಬಹುದು. ಹೀಗಾದಾಗ ಕೈಯ್ಯಲ್ಲಿ ಕ್ಯಾಶ್ ಕೊಂಡು ಹೋಗುವ ಅಗತ್ಯವೇ ಇರುವುದಿಲ್ಲ.
ನೇಪಾಳ ಮತ್ತು ಭೂತಾನ್ಗೆ ಪ್ರಯಾಣಿಸುವ ಭಾರತೀಯರಿಗೆ UPI ಬಹಳ ಸಹಾಯ ಮಾಡಲಿದೆ. ಅನೇಕ ಅಂಗಡಿಗಳು, ಹೋಟೆಲ್ಗಳು ಮತ್ತು ಔಟ್ಲೆಟ್ಗಳಲ್ಲಿ UPI ಬಳಸಿ ಪೇಮೆಂಟ್ ಮಾಡಬಹುದಾಗಿದೆ. ಇದು ಕರೆನ್ಸಿ ವಿನಿಮಯ ಅಗತ್ಯವನ್ನು ಕಡಿಮೆ ಮಾಡುತ್ತದೆ. ಇದರ ಬದಲು ಕೆಲವೇ ಸೆಕೆಂಡುಗಳಲ್ಲಿ ಮೊಬೈಲ್ ಪೇಮೆಂಟ್ಗೆ ಅನುವು ಮಾಡಿಕೊಡುತ್ತದೆ.
UPI ವೈಶಿಷ್ಟ್ಯವನ್ನು ಅಳವಡಿಸಿಕೊಂಡ ದೇಶಗಳ ಪಟ್ಟಿಗೆ ಗ್ರೀಸ್ ಇತ್ತೀಚೆಗೆ ಸೇರಿದೆ. ನೀವು ಅಥೆನ್ಸ್ನ ಐತಿಹಾಸಿಕ ತಾಣಗಳಿಗೆ ಭೇಟಿ ನೀಡುತ್ತಿರಲಿ ಅಥವಾ ಸ್ಯಾಂಟೊರಿನಿ ಮತ್ತು ಮೈಕೊನೊಸ್ಗೆ ಪ್ರಯಾಣಿಸುತ್ತಿರಲಿ, ಶಾಪಿಂಗ್ ಮತ್ತು ಪ್ರಯಾಣ ಎರಡನ್ನೂ ಸುಲಭಗೊಳಿಸುವ ಡಿಜಿಟಲ್ ಪೇಮೆಂಟ್ ಇಲ್ಲಿ ಬಹುತೇಕ ಸ್ಥಳಗಳಲ್ಲಿ ಲಭ್ಯವಿದೆ. ಹಾಗಾಗಿ ಶಾಪಿಂಗ್ ಇಲ್ಲಿ ಸಮಸ್ಯೆಯಾಗುವುದಿಲ್ಲ.
ಭಾರತೀಯ UPI ಅನ್ನು ಅಳವಡಿಸಿಕೊಂಡ ದೇಶಗಳಲ್ಲಿ ಸಿಂಗಾಪುರವೂ ಒಂದು. ಇಲ್ಲಿನ ಪ್ರವಾಸಿಗರು ಶಾಪಿಂಗ್ ಮಾಲ್, ಕೆಫೆ, ರೆಸ್ಟೋರೆಂಟ್ ಮತ್ತು ಇತರ ಹಲವು ಸ್ಥಳಗಳಲ್ಲಿ ಮೊಬೈಲ್ ಪೇಮೆಂಟ್ ಅನ್ನು ಸುಲಭವಾಗಿ ಮಾಡಬಹುದಾಗಿದೆ. ಇದು ಹಣವನ್ನು ವಾಪಸ್ ಪಡೆಯುವ ಅಥವಾ ಪದೇ ಪದೇ ಹಣವನ್ನು ವಿನಿಮಯ ಮಾಡಿಕೊಳ್ಳುವ ಕೆಲಸವನ್ನು ತಪ್ಪಿಸುತ್ತದೆ.
ಕತಾರ್, ದುಬೈ ಮತ್ತು ಅಬುಧಾಬಿಯಂತಹ ಜನಪ್ರಿಯ ಪ್ರವಾಸಿ ತಾಣಗಳಲ್ಲಿ ಕೂಡಾ UPI ಬಳಕೆ ನಿಧಾನವಾಗಿ ಹೆಚ್ಚುತ್ತಿದೆ. ಅನೇಕ ಚಿಲ್ಲರೆ ಅಂಗಡಿಗಳು, ವಿಮಾನ ನಿಲ್ದಾಣಗಳು, ರೆಸ್ಟೋರೆಂಟ್ಗಳು ಮತ್ತು ಕೆಲವು ಪ್ರವಾಸಿ ತಾಣಗಳಲ್ಲಿ ಪೇಮೆಂಟ್ ಮಾಡುವುದಕ್ಕಾಗಿ QR ಕೋಡ್ ಸ್ಕ್ಯಾನರ್ ಅನ್ನು ನೀಡುತ್ತವೆ.
ಫ್ರಾನ್ಸ್, ಮಾರಿಷಸ್ ಮತ್ತು ಶ್ರೀಲಂಕಾ
ಯುಪಿಐ ಪಾವತಿಗಳನ್ನು ಪರಿಚಯಿಸಿದ ಮೊದಲ ಯುರೋಪಿಯನ್ ದೇಶ ಫ್ರಾನ್ಸ್. ಮಾರಿಷಸ್ ಮತ್ತು ಶ್ರೀಲಂಕಾ ಕೂಡಾ ಈ ನೀತಿಯನ್ನು ಅನುಸರಿಸುತ್ತಿದೆ. ಈ ದೇಶಗಳ ಪ್ರವಾಸಿಗರು ಈಗ ಅನೇಕ ಹೋಟೆಲ್ಗಳು, ಸ್ಥಳೀಯ ಮಾರ್ಕೆಟ್, ಕಡಲತೀರ ಮತ್ತು ರೆಸ್ಟೋರೆಂಟ್ಗಳಲ್ಲಿ ಡಿಜಿಟಲ್ ಪೇಮೆಂಟ್ ಅನ್ನು ಸುಲಭವಾಗಿ ಮಾಡುತ್ತಾರೆ. ಈ ಮೂಲಕ ಪ್ರಯಾಣದ ಅನುಭವವನ್ನು ಸುಲಭಗೊಳಿಸಲು ಸಾಧ್ಯವಾಗುತ್ತಿದೆ.
ಪ್ರಪಂಚದಾದ್ಯಂತ ಅನೇಕ ದೇಶಗಳಲ್ಲಿ UPI ಲಭ್ಯವಿರುವುದರಿಂದ, ಭಾರತೀಯರ ಕೆಲಸ ಬಹಳ ಸುಲಭವಾಗಿದೆ. ಈಗ, ಪ್ರತಿ ಬಾರಿಯೂ ವಿದೇಶಿ ಕರೆನ್ಸಿ ಅಥವಾ ಅಂತರರಾಷ್ಟ್ರೀಯ ಕಾರ್ಡ್ಗಳನ್ನು ಜೊತೆಯಲ್ಲಿ ತೆಗೆದುಕೊಂಡು ಹೋಗುವ ಅಗತ್ಯ ಇರುವುದಿಲ್ಲ. UPI ಲಭ್ಯವಿರುವಲ್ಲಿ, ಮೊಬೈಲ್ನಿಂದ QR ಕೋಡ್ ಅನ್ನು ಸ್ಕ್ಯಾನ್ ಮಾಡುವ ಮೂಲಕ ಸೆಕೆಂಡುಗಳಲ್ಲಿ ಪೇಮೆಂಟ್ಗಳನ್ನು ಮಾಡಬಹುದಾಗಿದೆ. ಈ ವೈಶಿಷ್ಟ್ಯವನ್ನು ಅಳವಡಿಸಿಕೊಳ್ಳುತ್ತಿರುವ ದೇಶಗಳಿಗೆ ಪ್ರಯಾಣಿಸುವುದು ಸುಲಭ ಮತ್ತು ಸುರಕ್ಷಿತವಾಗುತ್ತಿದೆ.