ನೋಕಿಯಾ: ಜಾಗತಿಕವಾಗಿ 20% ಉದ್ಯೋಗ ಕಡಿತ! ಕಂಪನಿಯಿಂದ 14,000 ನೌಕರರು ವಜಾ

ಒಂದು ಕಾಲದಲ್ಲಿ ವಿಶ್ವದ ಅಗ್ರ ಫೋನ್ ತಯಾರಕವಾಗಿದ್ದ ನೋಕಿಯಾ ಇದೀಗ ದೊಡ್ಡ ಮಟ್ಟದ ಪುನರ್‌ರಚನೆಗೆ ಮುಂದಾಗಿದ್ದು, ಜಾಗತಿಕವಾಗಿ ಉದ್ಯೋಗಿಗಳನ್ನು ಕಡಿತಗೊಳಿಸಲು ಸಿದ್ಧತೆ ನಡೆಸುತ್ತಿದೆ. ಕಂಪನಿಯ ಯೋಜನೆಯಂತೆ ಒಟ್ಟು 14,000 ಉದ್ಯೋಗಿಗಳನ್ನು ಕಡಿಮೆ ಮಾಡುವ ಸಾಧ್ಯತೆ ಇದ್ದು, ಅದರ ಭಾಗವಾಗಿ ಭಾರತದಲ್ಲೂ ವಜಾಗೊಳಿಕೆ ನಡೆಯುವ ಸಾಧ್ಯತೆ ಇದೆ.

ವರದಿಗಳ ಪ್ರಕಾರ, ನೋಕಿಯಾ ತನ್ನ ಜಾಗತಿಕ ಉದ್ಯೋಗಿಗಳಲ್ಲಿ ಸುಮಾರು 20% ಕಡಿತಗೊಳಿಸುವ ನಿರೀಕ್ಷೆಯಿದೆ. ಪ್ರಸ್ತುತ ಕಂಪನಿಯಲ್ಲಿ 74,000ಕ್ಕೂ ಹೆಚ್ಚು ಉದ್ಯೋಗಿಗಳು ಕೆಲಸ ಮಾಡುತ್ತಿದ್ದು, ಭಾರತದಲ್ಲಿಯೇ 17,000ಕ್ಕೂ ಹೆಚ್ಚು ಸಿಬ್ಬಂದಿ ಇದ್ದಾರೆ.
ಈ ಕ್ರಮವು ಇತ್ತೀಚೆಗೆ ಅಮೇಜಾನ್ (Amazon), ಮೈಕ್ರೋಸಾಫ್ಟ್ (Microsoft) ಮತ್ತು ಗೂಗಲ್ (Google) ಸೇರಿದಂತೆ ಹಲವು ತಂತ್ರಜ್ಞಾನ ದಿಗ್ಗಜಗಳು ಸಾವಿರಾರು ಉದ್ಯೋಗಿಗಳನ್ನು ವಜಾಗೊಳಿಸಿರುವ ಹಿನ್ನೆಲೆಯಲ್ಲಿಯೇ ಗಮನ ಸೆಳೆಯುತ್ತಿದೆ.

ಇದೇ ವೇಳೆ ಮೇಟಾ (Meta) ಕೂಡ 15,000ಕ್ಕೂ ಹೆಚ್ಚು ಉದ್ಯೋಗಿಗಳನ್ನು ಕಡಿತಗೊಳಿಸುವ ಸಾಧ್ಯತೆ ಕುರಿತು ವರದಿಗಳು ಹರಿದಾಡುತ್ತಿವೆ.ನೋಕಿಯಾದ ಭಾರತದಲ್ಲಿನ ವ್ಯವಹಾರ ಪ್ರದರ್ಶನ ಕುಸಿತ ಕಂಡಿದ್ದು, 2025ರ ನಾಲ್ಕನೇ ತ್ರೈಮಾಸಿಕದಲ್ಲಿ ಕಂಪನಿಯ ನಿವ್ವಳ ಮಾರಾಟ ವರ್ಷದಿಂದ ವರ್ಷಕ್ಕೆ 15% ಇಳಿಕೆಯಾಗಿದ್ದು, 393 ಮಿಲಿಯನ್ ಯುರೋ (ಸುಮಾರು ₹4,290 ಕೋಟಿ) ಆಗಿದೆ. ಕಳೆದ ವರ್ಷದ ಇದೇ ಅವಧಿಯಲ್ಲಿ ಇದು 463 ಮಿಲಿಯನ್ ಯುರೋ (ಸುಮಾರು ₹5,000 ಕೋಟಿ) ಇತ್ತು ಎಂದು ಕಂಪನಿ ತಿಳಿಸಿದೆ.

ನಿಮ್ಮೂರಿನ ಸುದ್ದಿ, ಈಗ 'ಸುದ್ದಿ ಒನ್' ನಲ್ಲಿ!

ನಿಮ್ಮ ಊರಿನ ಅದ್ಧೂರಿ ಜಾತ್ರೆ, ವಿಶೇಷ ಆಚರಣೆಗಳು, ಅಥವಾ ನಿಮ್ಮ ಗಮನಕ್ಕೆ ಬಂದ ಸ್ಥಳೀಯ ಸಮಸ್ಯೆಗಳೇ? ಚಿತ್ರದುರ್ಗ ಹಾಗೂ ಸುತ್ತಮುತ್ತಲಿನ ಯಾವುದೇ ಸುದ್ದಿಯಾದರೂ ನಮಗೆ ತಿಳಿಸಿ. ನಿಮ್ಮ ಧ್ವನಿಯಾಗಿ ನಾವು ನಾಡಿಗೆ ತಲುಪಿಸುತ್ತೇವೆ. ಛಾಯಾಚಿತ್ರ ಮತ್ತು ವಿವರಗಳೊಂದಿಗೆ ನಮಗೆ ಇಮೇಲ್ ಮಾಡಿ.