Krishna Janmashtami 2026: 15 ವರ್ಷಗಳ ಬಳಿಕ ಕೃಷ್ಣ ಜನ್ಮಾಷ್ಟಮಿಯಂದು 6 ಶುಭ ಯೋಗ: ಉಪವಾಸ ಮಾಡಿದರೆ ಸಿಗುವ ಫಲವೇನು?
ಪ್ರತಿ ವರ್ಷ ಕೃಷ್ಣ ಪಕ್ಷದ ಅಷ್ಟಮಿ ತಿಥಿಯಂದು ಕೃಷ್ಣ ಜನ್ಮಾಷ್ಟಮಿಯನ್ನು ಆಚರಿಸಲಾಗುತ್ತದೆ. ಇದು ಕೇವಲ ಹಬ್ಬವಲ್ಲ, ಪ್ರೀತಿ, ನಂಬಿಕೆ ಮತ್ತು ಭಕ್ತಿಯ ಪ್ರತೀಕವಾಗಿದೆ. ಧಾರ್ಮಿಕ ನಂಬಿಕೆಗಳ ಪ್ರಕಾರ, ಈ ಪವಿತ್ರ ದಿನದಂದು ಶ್ರೀಕೃಷ್ಣನು ಮಧ್ಯರಾತ್ರಿಯಲ್ಲಿ ಮಥುರಾದ ಸೆರೆಮನೆಯಲ್ಲಿ ದೇವಕಿಯ ಗರ್ಭದಿಂದ ಜನಿಸುತ್ತಾನೆ.
ಈ ಬಾರಿ ಶ್ರೀ ಕೃಷ್ಣ ಜನ್ಮಾಷ್ಟಮಿಯ ದಿನ ವಿಶೇಷ ಶುಭ ಯೋಗ ರೂಪುಗೊಳ್ಳುತ್ತಿದೆ. ಪ್ರತೀ ವರ್ಷ ಗೃಹಸ್ಥರು ಮತ್ತು ಸಾಧುಗಳು ಬೇರೆ ಬೇರೆ ದಿನ ಕೃಷ್ಣ ಜನ್ಮಾಷ್ಟಮಿಯನ್ನು ಆಚರಿಸುತ್ತಾರೆ. ಆದರೆ ಈ ಬಾರಿಯ ವಿಶೇಷತೆಯೆಂದರೆ, ಗೃಹಸ್ಥರು ಮತ್ತು ಸಾಧುಗಳು ಇಬ್ಬರೂ ಒಂದೇ ದಿನ, ಅಂದರೆ ಸೆಪ್ಟೆಂಬರ್ 4ಕ್ಕೆ ಕೃಷ್ಣ ಜನ್ಮಾಷ್ಟಮಿಯ ಹಬ್ಬವನ್ನು ಆಚರಿಸುತ್ತಾರೆ. 15 ವರ್ಷಗಳ ನಂತರ ಜನ್ಮಾಷ್ಟಮಿಯಂದು ಇಂತಹ ಯೋಗ ರೂಪುಗೊಳ್ಳುತ್ತಿದೆ.
ಕ್ಯಾಲೆಂಡರ್ ಪ್ರಕಾರ, ಅಷ್ಟಮಿ ತಿಥಿ ಸೆಪ್ಟೆಂಬರ್ 3ರ ಮುಂಜಾನೆ 2.30 ಕ್ಕೆ ಪ್ರಾರಂಭವಾಗಿ ಸೆಪ್ಟೆಂಬರ್ 5ರ ಮಧ್ಯರಾತ್ರಿ 12.30 ರವರೆಗೆ ಇರುತ್ತದೆ. ಆದ್ದರಿಂದ, ಸೆಪ್ಟೆಂಬರ್ 4 ರಂದು ಶುಕ್ರವಾರ ಜನ್ಮಾಷ್ಟಮಿಯನ್ನು ಆಚರಿಸಲಾಗುವುದು. ಈ ದಿನದ ಪೂಜೆಗೆ ಶುಭ ಸಮಯ ಬೆಳಿಗ್ಗೆ 11.05ಕ್ಕೆ ಪ್ರಾರಂಭವಾಗಿ ಮಧ್ಯಾಹ್ನ 12.35 ರವರೆಗೆ ಇರುತ್ತದೆ. ರೋಹಿಣಿ ನಕ್ಷತ್ರವು ರಾತ್ರಿ 11.04 ರವರೆಗೆ ಇರುತ್ತದೆ. ಈ ಸಮಯದಲ್ಲಿ, ಭಕ್ತರು ಪೂರ್ಣ ವಿಧಿವಿಧಾನಗಳೊಂದಿಗೆ ಶ್ರೀಕೃಷ್ಣನನ್ನು ಪೂಜಿಸಬಹುದು.
ಜನ್ಮಾಷ್ಟಮಿ ಉಪವಾಸದ ಮಹತ್ವವೇನು?
ಜನ್ಮಾಷ್ಟಮಿಯಂದು, ಭಕ್ತರು ಬೆಳಿಗ್ಗೆ ಸ್ನಾನ ಮಾಡಿ ಶ್ರೀಕೃಷ್ಣನನ್ನು ಧ್ಯಾನಿಸಿದ ನಂತರ ಉಪವಾಸದ ಸಂಕಲ್ಪ ಮಾಡಬೇಕು. ಅನೇಕ ಭಕ್ತರು ಈ ದಿನ ನಿರ್ಜಲ ಉಪವಾಸವನ್ನು ಆಚರಿಸುತ್ತಾರೆ. ಕೆಲವರು ಹಣ್ಣುಗಳನ್ನು ಮಾತ್ರ ತಿನ್ನುವ ಮೂಲಕ ಉಪವಾಸ ಮಾಡುತ್ತಾರೆ. ದಿನವಿಡೀ, ಭಕ್ತಿಯಿಂದ ಶ್ರೀಕೃಷ್ಣನ ಸ್ತೋತ್ರಗಳನ್ನು ಹಾಡಿ ಮಂತ್ರಗಳನ್ನು ಪಠಿಸಲಾಗುವುದು.
ಶ್ರೀಕೃಷ್ಣನ ಜನನದ ಸಮಯದಲ್ಲಿ ಪೂಜೆ ಮಾಡುವ ಮೂಲಕ ರಾತ್ರಿ ಉಪವಾಸವನ್ನು ಮುರಿಯಲಾಗುತ್ತದೆ. ಧಾರ್ಮಿಕ ನಂಬಿಕೆಗಳ ಪ್ರಕಾರ, ಶ್ರೀಕೃಷ್ಣ ಜನ್ಮಾಷ್ಟಮಿಯ ಉಪವಾಸವು ವ್ಯಕ್ತಿಗೆ ಆಧ್ಯಾತ್ಮಿಕ ಶಾಂತಿಯನ್ನು ನೀಡುವುದು. ಕುಟುಂಬದಲ್ಲಿ ಸಂತೋಷ ಮತ್ತು ಸಮೃದ್ಧಿ ಹೆಚ್ಚಾಗುವುದು. ಮಕ್ಕಳ ಆಯುಷ್ಯ ಆರೊಗ್ಯ ವೃದ್ದಿಯಾಗುವುದು.
ಮನಸ್ಸಿನ ಆಸೆ ಈಡೇರಬೇಕಾದರೆ ಹೀಗೆ ಮಾಡಿ
ಮನದ ಆಸೆ ಈಡೇರಬೇಕಾದರೆ ಈ ದಿನ ವಿಶೇಷ ಪರಿಹಾರ ಕಾರ್ಯವನ್ನು ಮಾಡಬೇಕು. ಮನಸ್ಸಿನ ಬಹುಕಾಲದ ಆಸೆ ಈಡೇರಬೇಕಾದರೆ ಶ್ರೀಕೃಷ್ಣನ ಕೃಪೆಗೆ ಪಾತ್ರರಾಗಬೇಕು. ಇದಕ್ಕಾಗಿ ಕೃಷ್ಣನಿಗೆ ಬೆಳ್ಳಿ ಕೊಳಲನ್ನು ಅರ್ಪಿಸಬೇಕು. ನಿಮ್ಮ ಮನೆಯಲ್ಲಿ ಬಾಲಗೋಪಾಲನ ವಿಗ್ರಹವಿದ್ದರೆ ಅದಕ್ಕೆ ಬೆಳ್ಳಿ ಕೊಳಲನ್ನು ಅರ್ಪಿಸಬೇಕು.
ಇದರ ಬದಲು ದೇವಾಲಯಕ್ಕೂ ಬೆಳ್ಳಿ ಕೊಳಲನ್ನು ಅರ್ಪಿಸಬಹುದು. ಇನ್ನು ಬೆಳ್ಳಿ ಕೊಳಲನ್ನು ಖರೀದಿಸುವುದು ಸಾಧ್ಯವಿಲ್ಲ ಎಂದಾದರೆ ಸಾಮಾನ್ಯ ಕೊಳಲನ್ನು ಖರೀದಿಸಿ, ಅದರಲ್ಲಿ ನಿಮ್ಮ ಮನಸ್ಸಿನ ಆಸೆಯನ್ನು ಬರೆದಿಟ್ಟು ಶ್ರೀ ಕೃಷ್ಣನ ಪಾದಗಳಿಗೆ ಅರ್ಪಿಸಬೇಕು. ಜನ್ಮಾಷ್ಟಮಿಯಂದು ಶ್ರೀಕೃಷ್ಣನಿಗೆ ಕೊಳಲನ್ನು ಅರ್ಪಿಸುವುದರಿಂದ ನಿಮ್ಮ ಮನಸ್ಸಿನ ಎಲ್ಲಾ ಆಸೆಗಳು ಈಡೇರುತ್ತವೆ ಎನ್ನುವುದು ನಂಬಿಕೆ.
ಜನ್ಮಾಷ್ಟಮಿಯಂದು ರೂಪುಗೊಳ್ಳುವ ಶುಭ ಯೋಗಗಳು
ಜ್ಯೋತಿಷ್ಯ ಲೆಕ್ಕಾಚಾರಗಳ ಪ್ರಕಾರ, ಜನ್ಮಾಷ್ಟಮಿಯ ದಿನದಂದು, ಶ್ರೀ ಕೃಷ್ಣ ಜಯಂತಿ ಯೋಗ, ಹರ್ಷ ಯೋಗ ಮತ್ತು ಗುರುವು ಉಚ್ಚ ರಾಶಿಯಲ್ಲಿರುವುದರೊಂದಿಗೆ ಹಂಸರಾಜ ಯೋಗ ರೂಪುಗೊಳ್ಳುತ್ತಾ ಇದೆ. ಅಲ್ಲದೆ, ಶುಕ್ರ ಉಚ್ಚ ರಾಶಿಯಲ್ಲಿ ಇರುವುದರಿಂದ, ಮಾಲವ್ಯ ರಾಜಯೋಗ ಕೂಡಾ ರೂಪುಗೊಳ್ಳುತ್ತಿದೆ. ಸಿಂಹ ರಾಶಿಯಲ್ಲಿ ಸೂರ್ಯ ಮತ್ತು ಬುಧನ ಸಂಯೋಗವು ಬುಧಾದಿತ್ಯ ಯೋಗ ಮತ್ತು ನವಪಂಚಮ ರಾಜಯೋಗ ನಿರ್ಮಾಣವಾಗುತ್ತಿದೆ.
ಈ ಶುಭ ಯೋಗಗಳ ಸಮಯದಲ್ಲಿ ಉಪವಾಸ ಮಾಡುವುದರಿಂದ ಶೃದ್ದಾ ಭಕ್ತಿಯಿಂದ ಶ್ರೀಕೃಷ್ಣನನ್ನು ಪೂಜಿಸುವುದರಿಂದ, ಗ್ರಹಗಳ ಅಶುಭ ಪರಿಣಾಮಗಳು ಕಡಿಮೆಯಾಗುವುದು. ಎಲ್ಲಾ ರೀತಿಯ ದೋಷಗಳು ಸಹ ದೂರವಾಗುವುದು. ಸಂತೋಷ, ಸಮೃದ್ಧಿ ಹೆಚ್ಚಾಗುವುದರ ಜೊತೆಗೆ ಮನಸ್ಸಿನ ಆಸೆಗಳು ಕೂಡಾ ಈಡೇರುತ್ತವೆ.