ಒಂದೇ ರಕ್ತ ಪರೀಕ್ಷೆಯ ಮೂಲಕ 10 ಬಗೆಯ ಕ್ಯಾನ್ಸರ್ ಪತ್ತೆ? ಭಾರತದಲ್ಲಿ ಆರಂಭಿಕ ಹಂತದ ತಪಾಸಣೆ ಇನ್ನು ಸುಲಭ!

ದೆಹಲಿ.ಜುಲೈ.05: ಭಾರತದಲ್ಲಿ ಕ್ಯಾನ್ಸರ್ ಅತ್ಯಂತ ದೊಡ್ಡ ಆರೋಗ್ಯ ಸವಾಲುಗಳಲ್ಲಿ ಒಂದಾಗಿದೆ. ದೇಶದಲ್ಲಿ ಬಹುತೇಕ ಕ್ಯಾನ್ಸರ್ ಪ್ರಕರಣಗಳು ರೋಗದ ಲಕ್ಷಣಗಳು ಕಾಣಿಸಿಕೊಂಡ ನಂತರವೇ, ಅಂದರೆ ಕೊನೆಯ ಹಂತದಲ್ಲಿ ಪತ್ತೆಯಾಗುತ್ತಿರುವುದರಿಂದ ಚಿಕಿತ್ಸೆ ನೀಡುವುದು ಕಷ್ಟಸಾಧ್ಯವಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಕ್ಯಾನ್ಸರ್ ಅನ್ನು ಆರಂಭಿಕ ಹಂತದಲ್ಲೇ ಪತ್ತೆಹಚ್ಚುವ ನಿಟ್ಟಿನಲ್ಲಿ ಒಂದು ಮಹತ್ವದ ಹೆಜ್ಜೆ ಇಡಲಾಗಿದೆ.

ಅಹಮದಾಬಾದ್ ಮೂಲದ ಜೈಡಸ್ ಲೈಫ್ಸೈನ್ಸಸ್ (Zydus Lifesciences) ಸಂಸ್ಥೆಯು ಅಪೊಲೊ ಹಾಸ್ಪಿಟಲ್ಸ್ ಜೊತೆ ಕೈಜೋಡಿಸಿದ್ದು, ಭಾರತದಲ್ಲಿ ‘ಶೀಲ್ಡ್ ಮಲ್ಟಿ-ಕ್ಯಾನ್ಸರ್ ಡಿಟೆಕ್ಷನ್’ (Shield MCD) ಎಂಬ ಅತ್ಯಾಧುನಿಕ ರಕ್ತ ಪರೀಕ್ಷೆಯನ್ನು ಪರಿಚಯಿಸಿದೆ. ಇದು ಒಂದೇ ಬಾರಿ ರಕ್ತದ ಮಾದರಿಯನ್ನು ಪಡೆಯುವ ಮೂಲಕ 10 ಸಾಮಾನ್ಯ ಬಗೆಯ ಕ್ಯಾನ್ಸರ್ಗಳ ಲಕ್ಷಣಗಳನ್ನು ಸ್ಕ್ರೀನಿಂಗ್ ಮಾಡುವ ಸಾಮರ್ಥ್ಯ ಹೊಂದಿದೆ.

ಯುಎಸ್ ಮೂಲದ ಪ್ರೆಸಿಸನ್ ಆಂಕೊಲಾಜಿ ಕಂಪನಿಯಾದ ಗಾರ್ಡಂಟ್ ಹೆಲ್ತ್ (Guardant Health) ಈ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಿದೆ. ಭಾರತದಲ್ಲಿ ಇಂತಹ ಮಲ್ಟಿ-ಕ್ಯಾನ್ಸರ್ ಆರಂಭಿಕ ಪತ್ತೆ (MCED) ತಂತ್ರಜ್ಞಾನ ಲಭ್ಯವಾಗುತ್ತಿರುವುದು ಇದೇ ಮೊದಲು. ಇದು ಕ್ಯಾನ್ಸರ್ ತಪಾಸಣಾ ರಂಗದಲ್ಲಿ ದೊಡ್ಡ ಕ್ರಾಂತಿ ಸೃಷ್ಟಿಸಲಿದೆ ಎಂದು ತಜ್ಞರು ನಂಬಿದ್ದರೂ, ಇದು ಸಾಂಪ್ರದಾಯಿಕ ಕ್ಯಾನ್ಸರ್ ತಪಾಸಣೆಗಳಿಗೆ ಸಂಪೂರ್ಣ ಪರ್ಯಾಯವಲ್ಲ ಅಥವಾ ಇದೊಂದು ಅಂತಿಮ ರೋಗನಿರ್ಣಯದ ಸಾಧನವಲ್ಲ ಎಂದೂ ಎಚ್ಚರಿಸಿದ್ದಾರೆ.

ಏನಿದು ಶೀಲ್ಡ್ ಮಲ್ಟಿ-ಕ್ಯಾನ್ಸರ್ ಡಿಟೆಕ್ಷನ್ (Shield MCD) ಟೆಸ್ಟ್?
ಈ ಶೀಲ್ಡ್ ಎಮ್ಸಿಡಿ (Shield MCD) ಪರೀಕ್ಷೆಯನ್ನು ಕ್ಯಾನ್ಸರ್ ಬರುವ ಸಾಧಾರಣ ಅಪಾಯವನ್ನು ಹೊಂದಿರುವ 45 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನವರಿಗಾಗಿ ವಿನ್ಯಾಸಗೊಳಿಸಲಾಗಿದೆ.

ಕಾರ್ಯನಿರ್ವಹಣೆ: ಇದು ಕೇವಲ ಒಂದೇ ಒಂದು ಕ್ಯಾನ್ಸರ್ ಹುಡುಕುವ ಬದಲಿಗೆ, ಕ್ಯಾನ್ಸರ್ ಕೋಶಗಳು ರಕ್ತಪ್ರವಾಹಕ್ಕೆ ಬಿಡುಗಡೆ ಮಾಡುವ ಡಿಎನ್ಎ (DNA) ತುಣುಕುಗಳಲ್ಲಿನ ರಾಸಾಯನಿಕ ಬದಲಾವಣೆಗಳನ್ನು (Methylation Patterns) ವಿಶ್ಲೇಷಿಸುತ್ತದೆ.

ತಂತ್ರಜ್ಞಾನ: ಸುಧಾರಿತ ಜೀನೋಮಿಕ್ ತಂತ್ರಜ್ಞಾನ ಮತ್ತು ಕೃತಕ ಬುದ್ಧಿಮತ್ತೆಯನ್ನು (AI) ಬಳಸಿಕೊಂಡು, ಇದು ಅಸಹಜ ಡಿಎನ್ಎ ಸಂಕೇತಗಳನ್ನು ಪತ್ತೆ ಮಾಡುತ್ತದೆ. ಅಲ್ಲದೆ ಕ್ಯಾನ್ಸರ್ ದೇಹದ ಯಾವ ಅಂಗದಲ್ಲಿ ಉದ್ಭವಿಸಿದೆ ಎಂಬುದನ್ನು ಸಹ ಸೂಚಿಸುತ್ತದೆ.

ಯಾವೆಲ್ಲಾ ಕ್ಯಾನ್ಸರ್ ಪತ್ತೆ?: ಸ್ತನ ಕ್ಯಾನ್ಸರ್, ಶ್ವಾಸಕೋಶದ ಕ್ಯಾನ್ಸರ್, ಕೊಲೊರೆಕ್ಟಲ್ (ದೊಡ್ಡ ಕರುಳಿನ) ಕ್ಯಾನ್ಸರ್, ಯಕೃತ್ತು (ಲಿವರ್) ಕ್ಯಾನ್ಸರ್, ಮೇದೋಜ್ಜೀರಕ ಗ್ರಂಥಿ (ಪ್ಯಾಂಕ್ರಿಯಾಟಿಕ್) ಕ್ಯಾನ್ಸರ್, ಅಂಡಾಶಯದ (ಓವೇರಿಯನ್) ಕ್ಯಾನ್ಸರ್, ಪ್ರೊಸ್ಟೇಟ್ ಕ್ಯಾನ್ಸರ್, ಮೂತ್ರಕೋಶದ (ಬ್ಲಾಡರ್) ಕ್ಯಾನ್ಸರ್, ಜಠರ (ಹೊಟ್ಟೆ) ಮತ್ತು ಅನ್ನನಾಳದ ಕ್ಯಾನ್ಸರ್ಗಳನ್ನು ಇದು ಸ್ಕ್ರೀನ್ ಮಾಡುತ್ತದೆ.

ಸಾಂಪ್ರದಾಯಿಕ ತಪಾಸಣೆಗಿಂತ ಇದು ಹೇಗೆ ಭಿನ್ನ?
ಸಾಂಪ್ರದಾಯಿಕ ವಿಧಾನಗಳು ಸಾಮಾನ್ಯವಾಗಿ ಒಂದು ಬಾರಿಗೆ ಕೇವಲ ಒಂದು ಕ್ಯಾನ್ಸರ್ ಅನ್ನು ಮಾತ್ರ ಪರಿಶೀಲಿಸುತ್ತವೆ. ಉದಾಹರಣೆಗೆ: ಸ್ತನ ಕ್ಯಾನ್ಸರ್ಗೆ ಮ್ಯಾಮೊಗ್ರಫಿ, ಕರುಳಿನ ಕ್ಯಾನ್ಸರ್ಗೆ ಕೊಲೊನೋಸ್ಕೋಪಿ, ಮತ್ತು ಗರ್ಭಕಂಠದ ಕ್ಯಾನ್ಸರ್ಗೆ ಪಾಪ್ ಸ್ಮೀಯರ್ ಪರೀಕ್ಷೆ ಮಾಡಲಾಗುತ್ತದೆ.

ಆದರೆ, ಈ ಹೊಸ ರಕ್ತ ಪರೀಕ್ಷೆಯು ಏಕಕಾಲದಲ್ಲಿ 10 ಕ್ಯಾನ್ಸರ್ಗಳ ಸಂಕೇತಗಳನ್ನು ಗುರುತಿಸಲು ಪ್ರಯತ್ನಿಸುತ್ತದೆ. ಇದರಿಂದಾಗಿ ತಪಾಸಣೆ ಸುಲಭ ಮತ್ತು ಕಡಿಮೆ ನೋವಿನಿಂದ ಕೂಡಿರುತ್ತದೆ.

ಗಮನಿಸಿ: ಈ ಪರೀಕ್ಷೆಯಲ್ಲಿ ‘ಪಾಸಿಟಿವ್’ ಬಂದ ತಕ್ಷಣ ಕ್ಯಾನ್ಸರ್ ಇರುವುದು ಖಚಿತ ಎಂದಲ್ಲ. ಅದರರ್ಥ ಸ್ಕ್ಯಾನಿಂಗ್, ಎಂಡೋಸ್ಕೋಪಿ ಅಥವಾ ಬಯಾಪ್ಸಿಯಂತಹ ಹೆಚ್ಚಿನ ತಪಾಸಣೆಗಳ ಅಗತ್ಯವಿದೆ ಎಂದಷ್ಟೇ. ಹಾಗೆಯೇ, ‘ನೆೆಗೆಟಿವ್’ ಬಂದರೆ ಕ್ಯಾನ್ಸರ್ ಇಲ್ಲವೇ ಇಲ್ಲ ಎಂದೂ ಅರ್ಥವಲ್ಲ. ನಿಯಮಿತ ವೈದ್ಯಕೀಯ ತಪಾಸಣೆಗಳನ್ನು ಮುಂದುವರಿಸಬೇಕಾಗುತ್ತದೆ.

ಭಾರತಕ್ಕೆ ಇದು ಏಕೆ ಮುಖ್ಯ?
ವರದಿಗಳ ಪ್ರಕಾರ, ಭಾರತದಲ್ಲಿ 2022 ರಲ್ಲಿ 1.41 ದಶಲಕ್ಷಕ್ಕೂ ಹೆಚ್ಚು ಹೊಸ ಕ್ಯಾನ್ಸರ್ ಪ್ರಕರಣಗಳು ದಾಖಲಾಗಿದ್ದು, 90,000 ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದ್ದಾರೆ. ವ್ಯವಸ್ಥಿತ ತಪಾಸಣಾ ಕಾರ್ಯಕ್ರಮಗಳ ಕೊರತೆಯಿಂದಾಗಿ ಜನರು ರೋಗ ಉಲ್ಬಣಗೊಂಡ ಮೇಲೆಯೇ ಆಸ್ಪತ್ರೆಗೆ ಬರುತ್ತಾರೆ. ವಿಶೇಷವಾಗಿ ಪ್ಯಾಂಕ್ರಿಯಾಟಿಕ್, ಲಿವರ್ ಮತ್ತು ಅಂಡಾಶಯದ ಕ್ಯಾನ್ಸರ್ಗಳಿಗೆ ಯಾವುದೇ ಸಾಮಾನ್ಯ ಸ್ಕ್ರೀನಿಂಗ್ ವ್ಯವಸ್ಥೆ ಇಲ್ಲದಿರುವುದರಿಂದ, ಈ ರಕ್ತ ಪರೀಕ್ಷೆ ಭಾರತಕ್ಕೆ ಸಹಕಾರಿಯಾಗಬಲ್ಲದು.

ಆರು ಏಷ್ಯಾದ ದೇಶಗಳಲ್ಲಿ 84,000 ಕ್ಕೂ ಹೆಚ್ಚು ಜನರನ್ನು ಒಳಗೊಂಡಿ ನಡೆಸಿದ ದೊಡ್ಡ ಸಂಶೋಧನೆಯಲ್ಲಿ, ಈ ಎಮ್ಸಿಡಿ (MCED) ರಕ್ತ ಪರೀಕ್ಷೆಯು ಶೇಕಡಾ 79 ರಷ್ಟು ಕ್ಯಾನ್ಸರ್ಗಳನ್ನು ನಿಖರವಾಗಿ ಪತ್ತೆಹಚ್ಚಿದೆ ಮತ್ತು ಕ್ಯಾನ್ಸರ್ ಇಲ್ಲದವರನ್ನು ಶೇಕಡಾ 99.9 ರಷ್ಟು ನಿಖರತೆಯೊಂದಿಗೆ ಗುರುತಿಸಿದೆ. ಅಲ್ಲದೆ, ಶೇಕಡಾ 80 ರಷ್ಟು ಪ್ರಕರಣಗಳಲ್ಲಿ ಕ್ಯಾನ್ಸರ್ ಯಾವ ಅಂಗದಲ್ಲಿದೆ ಎಂಬುದನ್ನು ಸರಿಯಾಗಿ ಊಹಿಸಿದೆ.

ತಜ್ಞರ ಎಚ್ಚರಿಕೆ ಮತ್ತು ಲಭ್ಯತೆ
ಕ್ಯಾನ್ಸರ್ ಸಂಶೋಧಕರು ಈ ತಂತ್ರಜ್ಞಾನವನ್ನು ಸ್ವಾಗತಿಸಿದ್ದರೂ, ಇದನ್ನು ಕೇವಲ ಪೂರಕ ತಪಾಸಣಾ ಸಾಧನವಾಗಿ ನೋಡಬೇಕೇ ಹೊರತು ಅಂತಿಮ ವರದಿ ಎಂದು ನಂಬಬಾರದು ಎಂದು ಹೇಳಿದ್ದಾರೆ. ಭಾರತದ ವೈವಿಧ್ಯಮಯ ಜೀನ್ (Gene) ವ್ಯವಸ್ಥೆಗೆ ತಕ್ಕಂತೆ ಮುಂದಿನ ದಿನಗಳಲ್ಲಿ ಇಂತಹ ತಂತ್ರಜ್ಞಾನಗಳನ್ನು ಇನ್ನಷ್ಟು ಅಭಿವೃದ್ಧಿಪಡಿಸಬೇಕಿದೆ ಎಂದಿದ್ದಾರೆ.

ಭಾರತದಲ್ಲಿ ಈ ‘ಶೀಲ್ಡ್ ಎಮ್ಸಿಡಿ’ ಪರೀಕ್ಷೆಯ ಬೆಲೆ ಎಷ್ಟು ಎಂಬುದನ್ನು ಇನ್ನೂ ಅಧಿಕೃತವಾಗಿ ಪ್ರಕಟಿಸಲಾಗಿಲ್ಲ. ಆದಾಗ್ಯೂ, ಇದು ಶೀಘ್ರದಲ್ಲೇ ಅಪೊಲೊ ಆಸ್ಪತ್ರೆಗಳಲ್ಲಿ ಲಭ್ಯವಾಗಲಿದ್ದು, ದೇಶಾದ್ಯಂತ ‘ಡಾ. ಡ್ಯಾಂಗ್ಸ್ ಲ್ಯಾಬ್’ (Dr. Dang’s Lab) ಮೂಲಕವೂ ಲಭ್ಯವಾಗುವ ಸಾಧ್ಯತೆಯಿದೆ ಎಂದು ವರದಿಗಳು ತಿಳಿಸಿವೆ.