2026ರ ವರ್ಷದ ಅಂತ್ಯಕ್ಕೆ ಚಿನ್ನದ ಬೆಲೆಯಲ್ಲಿ ಶೇ.40 ರಷ್ಟು ಏರಿಕೆ?

ದೆಹಲಿ.ಜೂನ್.19: 2025ರಲ್ಲಿ ಶೇಕಡಾ 65 ರಷ್ಟು ಭಾರಿ ಜಿಗಿತ ಕಂಡಿದ್ದ ಹಳದಿ ಲೋಹ, ಈ ವರ್ಷದ ಆರಂಭದಿಂದ ಇಂದಿನವರೆಗೆ ಹೂಡಿಕೆದಾರರಿಗೆ ನಿರಾಸೆ ಮೂಡಿಸಿದೆ. ಆದರೆ, ಜಾಗತಿಕ ಹಣಕಾಸು ಸಂಸ್ಥೆ ‘ಜೆ.ಪಿ. ಮಾರ್ಗನ್ ಗ್ಲೋಬಲ್ ರಿಸರ್ಚ್’ (J.P. Morgan Global Research) ಮಾತ್ರ ಚಿನ್ನದ ಮೇಲಿನ ಭರವಸೆಯನ್ನು ಕೈಬಿಟ್ಟಿಲ್ಲ. 2026ರ ನಾಲ್ಕನೇ ತ್ರೈಮಾಸಿಕದ (Q4) ಅಂತ್ಯದ ವೇಳೆಗೆ ಚಿನ್ನದ ಸರಾಸರಿ ಬೆಲೆ ಪ್ರತಿ ಔನ್ಸ್ಗೆ (Ounce) $6,000 ತಲುಪಬಹುದು ಮತ್ತು 2027ರ ವೇಳೆಗೆ ಇದು $6,300 ಕ್ಕೆ ಏರಬಹುದು ಎಂದು ಸಂಸ್ಥೆ ಅಂದಾಜಿಸಿದೆ.

ಇದರರ್ಥ, ಪ್ರಸ್ತುತ $4,300 ಮಟ್ಟದಲ್ಲಿರುವ ಚಿನ್ನದ ಬೆಲೆಯು ಜೆ.ಪಿ. ಮಾರ್ಗನ್ ಲೆಕ್ಕಾಚಾರದಂತೆ ಮುನ್ನಡೆದರೆ, ವರ್ಷದ ಅಂತ್ಯದ ವೇಳೆಗೆ ಹೂಡಿಕೆದಾರರು ಶೇಕಡಾ 40 ರಷ್ಟು ಲಾಭವನ್ನು ಪಡೆಯುವ ಸಾಧ್ಯತೆಯಿದೆ. ಫೆಬ್ರವರಿ ಅಂತ್ಯದಲ್ಲಿ ಆರಂಭವಾದ ಯುಎಸ್-ಇಸ್ರೇಲ್ ಮತ್ತು ಇರಾನ್ ನಡುವಿನ ಸಂಘರ್ಷ ಚಿನ್ನದ ಮಾರುಕಟ್ಟೆಯ ಚಿತ್ರಣವನ್ನೇ ಬದಲಾಯಿಸಿತು. ಪ್ರಮುಖವಾಗಿ ‘ಸ್ಟ್ರೈಟ್ ಆಫ್ ಹಾರ್ಮುಜ್’ (Strait of Hormuz) ಜಲಮಾರ್ಗ ಬಂದ್ ಆದ ಹಿನ್ನೆಲೆಯಲ್ಲಿ ತೈಲ ಬೆಲೆಗಳು ಗಗನಕ್ಕೇರಿದವು. ಇದರ ಬೆನ್ನಲ್ಲೇ ಚಿನ್ನದ ಬೆಲೆ ಸುಮಾರು 20% ರಷ್ಟು ಕುಸಿತ ಕಂಡಿತು. ಹೆಚ್ಚಿದ ತೈಲ ಬೆಲೆಗಳು ಹಣದುಬ್ಬರದ ಆತಂಕವನ್ನು ಹೆಚ್ಚಿಸಿದವು, ಇದರಿಂದಾಗಿ ಬ್ಯಾಂಕ್ ಬಡ್ಡಿದರಗಳು ದೀರ್ಘಾವಧಿಯವರೆಗೆ ಗರಿಷ್ಠ ಮಟ್ಟದಲ್ಲೇ ಉಳಿಯಬಹುದು ಎಂಬ ನಿರೀಕ್ಷೆ ಮೂಡಿತು. ಚಿನ್ನವು ಯಾವುದೇ ಬಡ್ಡಿಯನ್ನು ನೀಡದ ಆಸ್ತಿಯಾಗಿರುವುದರಿಂದ (Zero-interest asset), ಬಡ್ಡಿದರಗಳು ಹೆಚ್ಚಾದಾಗ ಹೂಡಿಕೆದಾರರಿಗೆ ಇದರ ಮೇಲಿನ ಆಕರ್ಷಣೆ ಕಡಿಮೆಯಾಗುತ್ತದೆ.

ಯುಎಸ್ ಫೆಡರಲ್ ರಿಸರ್ವ್ನ ಬಡ್ಡಿದರ ನೀತಿಗಳು, ತೈಲ ಬೆಲೆ, ಹಣದುಬ್ಬರ, ಡಾಲರ್ ಮೌಲ್ಯ, ಜಾಗತಿಕ ವ್ಯಾಪಾರ ಮತ್ತು ಕೇಂದ್ರೀಯ ಬ್ಯಾಂಕ್ಗಳು ಮುಗಿಬಿದ್ದು ಚಿನ್ನ ಖರೀದಿಸುತ್ತಿರುವುದು ಸೇರಿದಂತೆ ಹಲವು ಪರ-ವಿರೋಧ ಅಂಶಗಳಿಂದಾಗಿ 2026ರಲ್ಲಿ ಚಿನ್ನದ ಬೆಲೆ ಯಾವುದೇ ನಿರ್ದಿಷ್ಟ ದಿಕ್ಕಿಲ್ಲದೆ ಏರಿಳಿತ ಕಾಣುತ್ತಿದೆ.

ಇರಾನ್ ಶಾಂತಿ ಒಪ್ಪಂದ: ಮಾರುಕಟ್ಟೆಯ ಗೇಮ್ ಚೇಂಜರ್?

ಜೂನ್ 19 ರಂದು (ಇಂದು) ಯುಎಸ್ ಮತ್ತು ಇರಾನ್ ನಡುವೆ ಸ್ವಿಟ್ಜರ್ಲೆಂಡ್ನಲ್ಲಿ ಮಹತ್ವದ ಶಾಂತಿ ಒಪ್ಪಂದಕ್ಕೆ ಸಹಿ ಬೀಳುವ ಸಾಧ್ಯತೆಯಿದೆ. ಈ ಒಪ್ಪಂದದ ಅಡಿಯಲ್ಲಿ ಇರಾನ್ ಮೇಲಿನ ನಿರ್ಬಂಧಗಳನ್ನು ತೆಗೆದುಹಾಕುವುದು ಮತ್ತು ಅದರ ಪರಮಾಣು ಯೋಜನೆಯನ್ನು ಸ್ಥಗಿತಗೊಳಿಸುವ ಅಂಶಗಳು ಸೇರಿವೆ. ಈ ಸುದ್ದಿಯ ಬೆನ್ನಲ್ಲೇ ಚಿನ್ನದ ಬೆಲೆ ಸತತ ಮೂರು ದಿನಗಳಿಂದ $4,300 ದಾಟಿ ಮುನ್ನಡೆಯುತ್ತಿದೆ.

ಯುದ್ಧ ಕೊನೆಗೊಂಡರೆ ತೈಲ ಬೆಲೆ ಮತ್ತು ಡಾಲರ್ ಮೌಲ್ಯ ಕುಸಿಯಲಿದ್ದು, ಇದು ಚಿನ್ನಕ್ಕೆ ಪೂರಕವಾಗಲಿದೆ. ಈಗಾಗಲೇ ಡಾಲರ್ ಇಂಡೆಕ್ಸ್ 99.67 ಕ್ಕೆ ಕುಸಿದಿದ್ದು, ಬ್ರೆಂಟ್ ಕಚ್ಚಾ ತೈಲ ಬೆಲೆ 4% ಕ್ಕಿಂತ ಹೆಚ್ಚು ಕುಸಿದು ಪ್ರತಿ ಬ್ಯಾರೆಲ್ಗೆ $83 ಕ್ಕಿಂತ ಕೆಳಗೆ ಬಂದಿದೆ. ಆದರೆ, ಒಂದು ವೇಳೆ ಜೂನ್ 19 ರ ಈ ಶಾಂತಿ ಒಪ್ಪಂದ ಮುರಿದುಬಿದ್ದರೆ ಪರಿಸ್ಥಿತಿ ಮತ್ತೆ ಉಲ್ಟಾ ಆಗಬಹುದು.

ಚಿನ್ನದ ಬೆಲೆಯಲ್ಲಿನ ಈ ತಿದ್ದುಪಡಿ (Correction) ಖರೀದಿಗೆ ಉತ್ತಮ ಅವಕಾಶ ನೀಡಬಹುದು. ಆದರೆ ಹೂಡಿಕೆದಾರರು ತರಾತುರಿಯಲ್ಲಿ ಬಾಟಮ್-ಪಿಕ್ಕಿಂಗ್ (ಕಡಿಮೆ ಬೆಲೆಗೆ ಸಿಗುತ್ತದೆ ಎಂದು ತಕ್ಷಣ ಖರೀದಿಸುವುದು) ಮಾಡಬಾರದು. ಮಾರುಕಟ್ಟೆಯಲ್ಲಿ ತಾಂತ್ರಿಕವಾಗಿ ಸ್ಥಿರತೆ ಮೂಡುವವರೆಗೆ ಕಾಯಬೇಕು” ಎಂದು ಮಾರ್ಕೆಟ್ಗೇಜ್ನ ಮುಖ್ಯ ಮಾರುಕಟ್ಟೆ ತಂತ್ರಜ್ಞರಾದ ಮಿಚೆಲ್ ಷ್ನೇಡರ್ ಸಲಹೆ ನೀಡಿದ್ದಾರೆ.

ಜೆ.ಪಿ. ಮಾರ್ಗನ್ ವರದಿಯ ಪ್ರಕಾರ, ಚಿನ್ನದ ಭವಿಷ್ಯವು ಸದ್ಯಕ್ಕೆ ಅನಿಶ್ಚಿತತೆಯಿಂದ ಕೂಡಿದೆ. 2026ರ ದ್ವಿತೀಯಾರ್ಧದಲ್ಲಿ ಇರಾನ್ ಶಾಂತಿ ಒಪ್ಪಂದ, ಕೇಂದ್ರೀಯ ಬ್ಯಾಂಕ್ಗಳ ಖರೀದಿ ಮತ್ತು ದೀರ್ಘಾವಧಿಯ ಹಣದುಬ್ಬರದ ಆತಂಕಗಳು ಚಿನ್ನದ ಬೆಲೆಯನ್ನು ಜಿಗಿತದತ್ತ ಕೊಂಡೊಯ್ಯಬಹುದು. ಇನ್ನು 2027ರಲ್ಲಿ ಚಿನ್ನವು 2026ರ ಅಂತಿಮ ಬೆಲೆಗಿಂತ ಕೇವಲ 5% ರಷ್ಟು ಸಾಧಾರಣ ಲಾಭವನ್ನು ನೀಡಬಹುದು ಎಂದು ಅಂದಾಜಿಸಲಾಗಿದೆ.